Hakerlerge 100 mln dollaryn urlatqan banktiń basshysy qyzmetinen ketti
ASTANA. QazAqparat - Bangladesh ortalyq bankiniń basshysy Atıýr Rahman eldiń altyn-valıýta qorynan 100 mln dollardy hakerler urlaǵannan keıin qyzmetinen ketti, dep habarlaıdy Bı-Bı-Sı agenttigi.
Aqpan aıynda kıber qylmyskerler ortalyq banktiń kompıýterlik júıesin buzyp kirip, onyń Nıý-Iorktegi Federaldyq rezerv bankindegi esep-shotyndaǵy aqshalaryn Fılıppındegi kazınoǵa jáne Shrı-Lankadaǵy esep-shotqa aýdaryp jibergen.
Ol qarjynyń qoldy bolǵandyǵyn úkimetke habarlamaǵany úshin bılik tarapynan qatty synǵa ushyrady.
Eldiń qarjy mınıstri Abýl Maal Abdýl Muhıt oqıǵadan bir aı ótken soń ǵana hakerlik shabýyl týraly gazetten oqyǵandyǵyn málimdegen.
Qazir Bangladesh ortalyq bankiniń basshylyǵy Shrı-Lankaǵa aýdarylyp ketken qarjyny qaıtarylǵandyǵyn, endigi kezekte Fılıppın bıligimen urlanǵan aqshanyń negizgi bóligin qaıtarý jaıy boıynsha kelissózder júrgizilip jatqandyǵyn atap ótken.
