Hakerler Malaysia Airlines áýe kompanııasynyń saıtyn buzdy
ASTANA. QazAqparat - Ótken jyly eki ushaǵy áýe apatyna ushyraǵan Malaysia Airlines avıakompanııasynyń saıtyn hakerler buzdy.
Shabýyl jasaǵany úshin jaýapkershilikti budan buryn Xbox Live pen Sony Playstation Network onlaın-servısterine shabýyldaǵan Lizard Squad toby moınyna aldy.
Malaızııadaǵy avıakompanııa saıtynyń basty paraǵyna «404 qateligi - Ushaq tabylmady» degen jazbamen qalpaqsha men frak kıgen kesirtke beınelengen. Tómende «Lizard Squad buzǵan - kıberhalıfattyń resmı habarlamasy» dep jazylǵan. Bul neni meńzeıtinin hakerler túsindirmegen.
Esterińizge sala keteıik, 2014 jyly naýryzda bortynda 239 jolaýshy bolǵan Malaysia Airlines kompanııasynyń "Boıng-777" laıneri Úndistan muhıtynyń ústinen ushyp bara jatqan sátinde joǵalyp ketken, sondaı-aq osy jyly shildede ekinshi ushaq Ýkraına shyǵysyndaǵy qaqtyǵys aımaǵynda qulap, 298 adam kóz jumǵan edi.
