Hakerler iri kompanııanyń shotynan 300 mln teńge urlady - Sanjar Ádilov
«Qarjylyq monıtorıng agenttigimen birlese nesıeleý, bank qyzmeti ári mobıldik aqsha aýdarý salasyndaǵy alaıaqtyqqa tosqaýyl qoıý boıynsha tıisti sharalar qabyldanyp jatyr. Qazirgi kezde Tergeý departamenti iri aktsıonerlik qoǵamnyń shottarynan 300 mln teńgeden astam qarajatty jymqyrǵan topqa qatysty qylmystyq isti tergep jatyr. Qarajatty jymqyrý kúdigine úsh adam ilikti, olar qamaýǵa alyndy», - dedi ol onlaın rejımdegi brıfıngide.
Belgili bolǵandaı, Almaty qalasynyń turǵyndary reseılik hakermen birge aktsıonerlik qoǵamnyń ınternet-resýrsynda jalǵan 14 akkaýnt qurǵan. Osy arqyly aqparattyq tólem júıesine kirgen.
«Osydan keıin qosarlanǵan tranzaktsııalar quryp, zańsyz túrde qarajatty elimizdegi jáne Reseıdegi ekinshi deńgeıli bankterdiń tólem kartalaryna aýdaryp otyrǵan. Sonymen qatar qarajat qazaqstandyq baılanys operatorlarynyń abonet nómirlerine aýdarylǵan», - dedi S. Ádilov.
Kúdiktiler qarajatty qolma-qol aqshaǵa aınaldyryp, tólem kartasyn izdeýmen, SIM kartalar satyp alýmen, urlanǵan aqshany bıtkoınǵa aıyrbastaýmen jáne ony krıptoámııanǵa aýdarýmen aınalysqan.
Qazirgi kezde tergeý amaldary jalǵasyp jatyr, sondaı-aq Reseıdiń quqyq qorǵaý organdarymen birlese barlyq kúdiktilerdi ustaý jumystary atqarylyp otyr.
Onyń aıtýynsha, alaıaqtyqtyń úlesi qylmystardyń arasynda 27 paıyzǵa jetip otyr. Jalpy qylmystyq quqyq buzýshylyqtar sany 20 paıyzǵa tómendegenine qaramastan, alaıaqtyq qylmys deńgeıi ósken. Osy oraıda ınternet alaıaqtyq faktileri kóbeıgeni baıqaldy.
«Bul qylmyspen kúrestiń tıimdilikti arttyrý úshin ishki ister organdary jedel-profılaktıkalyq is-sharalardy turaqty ótkizedi. Polıtsııanyń óńirlik departamentterinde ınternet alaıaqty anyqtaý boıynsha mamandandyrylǵan tergeý toptary quryldy. Qazirgi kezde olar atalǵan qylmystardy ashýǵa qatysty óz úlesin qosyp keledi», - dedi ol.
S. Ádilov atalǵan saladaǵy quqyq buzýshylyqtarǵa tosqaýyl qoıý maqsatynda Іshki ister mınıstrliginiń baǵdarlamasy bekitilgenin aıtty.