Hakerler Grýzııa prezıdenti ákimshiliginiń saıtyna shabýyl jasady
TBILISI. QazAqparat – Búgin Grýzııada 2 myńnan astam ınternet-saıtqa kıbershabýyl jasaldy. Olardyń arasynda memlekettik mekemelerdiń, sottardyń, úkimettik emes uıymdardyń, BAQ-tar men jeke kompanııalardyń saıttary bar. Bul týraly QazAqparat Novostı-Grýzıı agenttigine silteme jasap habarlaıdy.
Hakerler Grýzııa prezıdenti ákimshiliginiń www.president.gov.ge veb-portalyn da nysanaǵa alǵan. Olar saıttyń alǵashqy betine Mıhaıl Saakashvılıdiń sýretin ornalastyryp, astyna aǵylshyn tilinde «Men oralamyn» (I’ll be back) dep jazyp qoıǵan. Qazir saıt múldem ashylmaıdy.
Grýzııanyń úshinshi prezıdenti Mıhaıl Saakashvılı 2013 jyly el basshylyǵyndaǵy ekinshi merziminen keıin laýazymynan ketken edi. Saakashvılı merziminiń sońǵy jylynda oppozıtsııalyq mıllıarder Bıdzına Ivanıshvılıdiń «Grýzın armany» koalıtsııasy parlamenttik saılaýda jeńiske jetken bolatyn. Sodan beri Saakashvılı qurǵan «Birtutas ulttyq qozǵalys» Grýzııadaǵy eń iri oppozıtsııalyq partııa bolyp otyr.
Saakashvılı Ýkraınada saıasatpen aınalysyp júrse de, eline oralatyny týraly jıi aıtady. Biraq ony «laýazymyn asyra paıdalandy» dep, Grýzııa bıligi syrttaı sottap jibergen.
