Hakerler Frantsııadaǵy qan qoryn joıyp jibere jazdady

ASTANA. KAZINFORM — Frantsııada hakerler Frantsýz qan qyzmetiniń (EFS) qoımalaryndaǵy salqyndatý júıelerine shabýyl jasap, bıologııalyq materıaldar saqtalǵan oryndardaǵy temperatýrany qashyqtan Tselsıı boıynsha 110 gradýsqa deıin kóterýge tyrysqan, dep habarlaıdy Kazinform agenttigi Anadolu agenttigine silteme jasap.

krov
Foto: freepik.com

Frantsýz BAQ-tarynyń málimetinshe, kıbershabýyl Býrgýndııa — Fransh-Konte aımaǵynda bolǵan.

Qaskóıler Frantsýz qan qyzmetiniń konteınerlerine qyzmet kórsetetin Coolworld kompanııasynyń salqyndatý júıesine qol jetkizip, birneshe qoımadaǵy temperatýra parametrlerin mınýs 30 gradýstan plıýs 110 gradýsqa deıin ózgertken.

Alaıda tehnık temperatýranyń qalyptan tys kóterilgenin der kezinde baıqap, aýyr zardaptardyń aldyn alǵan.

Frantsııanyń Densaýlyq saqtaý mınıstrligi bul oqıǵa mekemeniń jumysyna áser etpegenin habarlady.

Frantsýz qan qyzmetiniń basshysy Frederık Pakýd saqtaýly materıaldardyń qaýipsizdigine nuqsan kelmegenin rastady. Sonymen qatar shabýyl saldarynan naýqastardy emdeýge arnalǵan úlgiler men qan plazmasynyń qoryn joǵaltý qaýpi bolǵanyn atap ótti.

Kıbershabýyldy uıymdastyrýshylardyń kim ekeni ázirge anyqtalǵan joq.

Buǵan deıin nemis tilindegi Charité ýnıversıtettik klınıkasynyń serverine hakerler shabýyl jasap, jeke baılanys derekterine qol jetkizgenin jazǵanbyz.

Sonymen qatar Japonııanyń GMO Internet Group ınternet-provaıderi valıýta saýdasy qyzmetine zańsyz kirgen hakerlerdi anyqtaýǵa kómektesetin aqparat úshin 1 mln dollarǵa deıin syıaqy beretinin málimdedi.