Hakerler «elektrondyq úkimet» nysandaryna jıi shabýyl jasaıdy

ASTANA. QazAqparat -  Búgin Astanada kıbershabýyldarǵa tosqaýyl qoıýǵa arnalǵan forýmda Qorǵanys jáne aeroǵarysh mınıstrligi Aqparattyq qaýipsizdik komıteti tóraǵacynyń orynbasary Rýslan Ábdiqalyqov Qazaqstandaǵy hakerlerdi qyzyqtyratyn nysandar týraly aıtty, dep habarlaıdy QazAqparat.

«Negizinen, «elektrondyq úkimet»  nysandaryna shabýyl jasalady. Sebebi hakerler Іshki ister mınıstrligi resýrstaryn shabýyldaýǵa asa qyzyqpaıdy. Máselen ІІM-ge shabýyl jasaldy dep aıtqan kezde shyn máninde haker neni urlaı alady? Kıberqylmysker tek mınıstrliktiń veb-saıtynan basqa eshteńeni kórmeıdi. Sondyqtan osy saıt hakerdi qyzyqtyrmaıdy. Onda jańalyqtar lentasy, mınıstr blogy bar, ıaǵnı mańyzdy málimetter joq. Sáıkesinshe, ІІM-nen eshqandaı aqparatty urlaı almaıdy. Al «Azamattarǵa arnalǵan úkimet» júıesi kúrdeli. Onda jeke málimetterdi óńdeý sharalary qamtylǵandyqtan, bul sala hakerlerdiń qyzyǵýshylyǵyn týdyrady. Osy oraıda biz ýaqytymyzdyń basym bóligin «elektrondyq úkimet» ónimderin qorǵaýǵa jumsaımyz», - dep toqtaldy Ábdiqalyqov.

Onyń sózine qaraǵanda, tsıfrlyq qoltańbamen  adamdar «elektrondyq úkimetpen» jumys istegen kezde málimetterdi urlaý táýekeli bar kórinedi.

Sóz sońynda R. Ábdiqalyqov jyl sońyna qaraı Aqparattyq qaýipsizdiktiń ulttyq úılestirý ortalyǵy paıdalanýǵa beriletinin atap ótti. Bul ortalyq barsha elimiz boıynsha monıtorıng júrgizip, memlekettik aqparattyq júıelerdi qorǵaıtyn bolady.

Budan buryn Rýslan Ábdiqalyqov kıberqaýipsizdik salasynda tehnologııalyq protsestermen aınalysatyn kompanııalarda úlken problemalar bar ekenin aıtqan bolatyn.