Hakerler 41 mln dollardyń bıtkoındaryn qoldy etti
NUR-SULTAN. QazAqparat - AZERTADJ - Hakerler krıptovalıýtalardy aıyrbastaıtyn iri onlaın-servısterdiń birine shabýyl jasady, dep habarlaıdy QazAqparat AZERTADJ agenttigine silteme jasap.
Binance servısiniń saıtynda jarııalanǵan málimdemege sáıkes, hakerler «málimetterge iri kólemde zııan keltirip», 7 myń bıtkoındi urlaǵan. TechCrunch ınternet-portalynyń jazýynsha, bul 41 mln dollarǵa teń.
Kompanııanyń aqparatyna sáıkes, kıbershabýyl kezinde, sondaı-aq ARІ kiltteri (tirkeý jazbasyn ıdentıfıkatsııalaıtyn qupııa kod), eki faktorly ıdentıfıkatsııa kodtary jáne jarııalanýǵa jatpaıtyn ózge de derekter urlanǵan.
«Ókinishke qaraı, servısti buzǵanǵa deıin qarjyny shyǵaryp úlgermedik», - delingen málimdemede.
Hakerler Binance-ta ornalasqan jalpy bıtkoındardyń 2 protsentke jýyǵyn qoldy etken. Onlaın-servıs qoldanýshylarǵa barlyq shyǵyndy ótep berýge ýáde etti. Kompanııada tergeý aıaqtalǵansha qarjyny tolyqtyrý jáne sheship alý protsedýralary ýaqytsha buǵattaldy.
