Hakan Fıdan: Taıaý Shyǵystaǵy turaqsyzdyq jahandyq qaýipsizdikke qaýip tóndiredi

ASTANA. KAZINFORM – Túrkııa Iran tóńiregindegi shıelenis jaǵdaıynda dıplomatııalyq kúsh-jigerin kúsheıtip, taraptardyń kelissózderge shuǵyl túrde oralýy qajettigin málimdep otyr, dep habarlaıdy Kazinform agenttiginiń Ankaradaǵy menshikti tilshisi.

Túrkııa Syrtqy ister mınıstri Hakan Fıdan Iran men búkil Taıaý Shyǵysta turaqtylyqty qamtamasyz etýdiń mańyzdylyǵyna toqtalyp, qazirgi shıelenisý tek aımaqtyq emes, jahandyq qaýipsizdikke de qaýip tóndiretinin basa aıtty. 

Fıdannyń cózinshe, AQSh pen Izraıldiń Iranǵa qarsy shabýyldary keń taraǵan turaqsyzdyq qaýpin arttyrady. Ol jaǵdaıdyń odan ary shıelenisýi búkil aımaq úshin kútpegen saldarǵa ákelýi múmkin ekenin atap ótti. 

Mınıstr Ankara shıelenisti báseńdetý jáne taraptardy dıalogqa qaıtarý úshin barlyq dıplomatııalyq arnany belsendi túrde paıdalanyp jatqanyn jetkizdi. 

– Biz turaqtylyqty qamtamasyz etý jáne tynysh atmosferany qalpyna keltirý úshin aıtarlyqtaı kúsh salýdamyz, - dedi ol. 

Túrkııa daǵdarystan shyǵýdyń jalǵyz turaqty joly dıplomatııa jáne aımaqtaǵy qaqtyǵystyń odan ary keńeıýine jol bermeýge qabiletti kelissózder protsesi dep sanaıdy.