Hakan Fıdan: Reseı men Ýkraına arasyndaǵy baılanysty retteý jolyn tańdaý taraptardyń erkinde

ASTANA.KAZINFORM - Qazir Ystanbulda Reseı men Ýkraına delegatsııalary arasynda jabyq kelissózder ótip jatyr. Taraptar qaqtyǵysty sheshý joldaryn ózderi sheshedi, dep málimdedi Túrkııanyń Syrtqy ister mınıstri Hakan Fıdan. Bul týraly Kazinform agenttiginiń menshikti tilshisi habarlaıdy.

Negizgi otyrys bastalar aldynda Reseı delegatsııasynyń basshysy Vladımır Medınskıı AQSh ókilimen bólek kelissóz júrgizdi. Sheteldik basylymdardyń jazýynsha, Medınskıı AQSh Memlekettik departamentiniń saıasatty josparlaý jónindegi dırektory Maıkl Antonmen sóılesken. Kezdesý nátıjesi, sondaı-aq onyń kún tártibi jarııalanbady.

Jıynnyń ashylý sózin Túrkııa Syrtqy ister mınıstri Hakan Fıdan jasady. Ol dıalogqa qatysýshylar shıelenisti sheshý jolyn óz betinshe anyqtaýy tıis ekenin atap ótti.

Buǵan deıin Túrkııa kelissózderge deldal retinde qatysatyny habarlanǵan. Alaıda túrik ókili kirispe sózden keıin otyrystan shyǵyp ketti. Bul taraptardyń kelissózderdi neǵurlym tar formatta – belsendi medıatsııasyz júrgizýge kelisimin kórsetedi.

Fıdannyń sózinen keıin kelissózder baspasóz ben syrttan baqylaýshylardyń qatysýynsyz jabyq esik jaǵdaıynda jalǵasty. Kezdesý formaty qupııalylyqty qamtamasyz etedi jáne taraptardyń ótkir máselelerdi tikeleı talqylaý múmkindigin beredi.

Baqylaýshylar bul raýndty sońǵy jyldardaǵy mańyzdy raýnd dep baǵalady. Alaıda, kelissóz nátıjesi belgisiz – delegatsııalardyń ymyraǵa kelýge daıyndyǵynyń dárejesi de solaı.

Uzaq úzilisten keıin Reseı men Ýkraına arasyndaǵy tikeleı dıalogtyń bastalýynyń ózi ilgeri qadam ekeni atalyp ótken. Alaıda, kelissózderdiń nátıjesin boljaý áli múmkin emes.

Ystanbulda Reseı men Ýkraına arasyndaǵy tikeleı kelissózder bastaldy, dep habarlaıdy túrik telearnasy.

Buǵan deıin Pýtın Ýkraınamen kelissóz júrgizetin Reseı delegatsııasynyń quramyn bekitkenin jazǵanbyz.