Qazaqstan ekonomıkasy bıyl qanshalyqty ósedi - Halyqaralyq valıýta qorynyń boljamy
ASTANA. KAZINFORM – Halyqaralyq valıýta qory 2026 jyly Qazaqstannyń ekonomıkalyq ósimi shamamen 4,6% deńgeıinde boldy dep boljady, sondaı-aq uıym eldiń bıýdjettik saldosy men syrtqy pozıtsııasy jaqsarady dep esepteıdi. Bul týraly QR Ulttyq bankiniń baspasóz qyzmeti habarlady.
Aıta keteıik, 3-12 maýsym aralyǵynda Qazaqstan Halyqaralyq valıýta qorynyń (budan ári – HVQ) Mıssııasyn qabyldady. Sapar qorytyndysy boıynsha eldegi qazirgi ekonomıkalyq jaǵdaıǵa, ekonomıkany damytý perspektıvalaryna sholýdy, sondaı-aq negizgi usynymdardy qamtıtyn qorytyndy málimdeme jarııalandy.
Mıssııanyń paıymdaýynsha, álemdik munaı baǵasynyń joǵary bolýy, ishki suranystyń serpindiligi men ınvestıtsııa aǵyny aıasynda Qazaqstannyń ekonomıkalyq ósimi turaqtylyq tanytyp otyr. Halyqaralyq rezervter jetkilikti deńgeıde saqtalyp, ımporttyń shamamen 10 aılyq kólemin jabýǵa qaýqarly. HVQ 2026 jyly ekonomıkalyq ósimdi shamamen 4,6% deńgeıinde boljaıdy, sondaı-aq eldiń bıýdjettik saldosy men syrtqy pozıtsııasy jaqsarady dep esepteıdi.
Bul rette bıýdjet tártibin saqtaý jáne memleket shyǵystarynyń tıimdiligin arttyrý Úkimettiń, Ulttyq bank pen Qazaqstan Respýblıkasy Qarjy naryǵyn retteý jáne damytý agenttiginiń 2026–2028 jyldarǵa arnalǵan makroekonomıkalyq turaqtandyrý jáne qarjy sektoryn damytý jónindegi birlesken is-qımyl baǵdarlamasyn (budan ári – Birlesken is-qımyl baǵdarlamasy) iske asyrý úshin sheshýshi mańyzǵa ıe.
Táýekel faktorlarynyń qatarynda ishki suranystyń kúsheıý yqtımaldyǵy, ımport baǵasynyń ósýi, jahandyq belgisizdik pen álemdik naryqtardaǵy qarjylyq sharttardyń qatańdaýy atap ótiledi, al bul jaǵdaılar ınvestıtsııalar aǵynyna keri áser etýi múmkin. Sonymen birge, Kaspıı qubyr konsortsıýmy qubyrynyń jumysyndaǵy yqtımal irkilister de qaýip retinde kórsetilgen.
Munaı baǵasynyń joǵary deńgeıde saqtalýy, Birlesken is-qımyl baǵdarlamasy sharalarynyń tıimdi iske asyrylýy jáne kommýnaldyq qyzmetter tarıfiniń reformasyn dáıekti júrgizý memlekettik qarjy men syrtqy sektordyń turaqtylyǵyn arttyrýǵa, sondaı-aq ınflıatsııalyq kútýlerdi bekitýge yqpal etýi múmkin.
Budan bólek, HVQ sarapshylary ınflıatsııanyń 2025 jylǵy qyrkúıektegi 12,9%-dan 2026 jylǵy mamyrda 10,4%-ǵa deıin tómendegenin atap ótti. Soǵan qaramastan, onyń deńgeıi áli de nysanaly baǵdardan joǵary bolyp tur. Osyǵan baılanysty HVQ ınflıatsııa boıynsha nysanaly kórsetkishke qol jetkizgenge deıin tejeýshi aqsha-kredıt saıasatyn saqtaý mańyzdylyǵyna aıryqsha nazar aýdarady.
Ulttyq banktiń artyq ótimdilikti tómendetýge baǵyttalǵan sharalary, sonyń ishinde eń tómengi rezervtik talap normatıvterin arttyrýy jáne notalar shyǵarý kólemin ulǵaıtýy ınflıatsııalyq qysymdy birtindep báseńdetýde mańyzdy ról atqarady.
-Bul sharalardyń tıimdiligin arttyrý úshin ekonomıkanyń «qyzyp ketýine» jol bermeý maqsatynda memlekettik jáne kvazımemlekettik qarjylandyrý salasynda áldeqaıda ustamdy saıasat júrgizý de mańyzdy. Buǵan naqty ýaqyt rejıminde bıýdjet qarajaty men Ulttyq qor resýrstarynyń paıdalanylýyn baqylaýdy, ataýlylyǵyn jáne ashyqtyqty arttyrýǵa múmkindik beretin Tsıfrlyq teńgeni engizý de yqpal ete alady,-delingen habarlamada.
HVQ baǵalaýy boıynsha, Qazaqstannyń makroekonomıkalyq saıasatty jetildirý jáne qurylymdyq reformalardy jalǵastyrý esebinen ınflıatsııany odan ári tómendetýge jáne ekonomıkalyq ósim áleýetin arttyrýǵa tolyq múmkindigi bar.
Aıta keteıik, osyǵan deıin Halyqaralyq valıýta qorynyń ókilderi 2031 jylǵa qaraı Qazaqstandaǵy jan basyna shaqqandaǵy ІJÓ 23 myń dollarǵa jetýi múmkin ekenin boljaǵan bolatyn.
