HackAlem AI: Qazaqstan álemdik rekordty jańartýdy kózdep otyr
ASTANA. KAZINFORM — Búgin Astanada HackAlem AI halyqaralyq hakatony bastaldy. Uıymdastyrýshylar álemdegi eń iri jasandy ıntellekt agentterin ázirleý hakatonyn ótkizip, Gınnestiń rekordyn jańartýdy kózdep otyr.
Bul týraly HackAlem AI halyqaralyq hakatonynyń ashylýynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Madıev aıtty.
Onyń sózinshe, buǵan deıin osyǵan uqsas hakatondaǵy álemdik rekord Úndistanda tirkelgen. Oǵan 2 089 adam qatysqan.
— Búgingi maqsatymyz — osy kórsetkishten asyp, jasandy ıntellekt agentterin ázirleý boıynsha álemdegi eń aýqymdy hakatondy ótkizý jáne Gınnestiń rekordtar kitabyna ený. Búgin hakatonǵa 2500-den astam adam qatysyp otyr, — dedi Jaslan Madıev ashylýynda.
Hakatonǵa Guinness World Records resmı tóreshisi Glenn Pollard ta qatysyp otyr.
Qatysýshylarǵa bes saǵat ishinde ekonomıkanyń on baǵytynyń biri boıynsha jumys isteıtin jasandy ıntellekt agentin ázirleý mindeti qoıylǵan.
Mınıstrdiń aıtýynsha, OpenAI-men seriktestik qatysýshylarǵa ozyq modelder men Codex-ti paıdalanýǵa múmkindik beredi. Al tehnologııalyq resýrstar men júldelerdiń jalpy kólemi 1,1 mıllıon dollar.
Hakaton fınalısteri óz sheshimderin 29 qyrkúıekte Demo Day aıasynda tanystyrady. Al jeńimpazdar 1 qazanda AI & Digital Bridge 2026 alańynda marapattalady.
Buǵan deıin 23 qyrkúıekte Astanada Qazaqstan men ózge elderden myńdaǵan ázirleýshiniń, stýdenttiń, jas maman men IT-entýzıastyń basyn qosatyn álemdegi eń iri AI-hakatondardyń biri — HackAlem AI ótetini habarlandy.
