Habıba, Halıma jáne Hamıda esimdi shymkenttik úshem úıine shyǵaryldy
ShYMKENT. KAZINFORM – Shymkentte osydan 1 aı buryn qalalyq perzenthanada dúnıege kelgen úshem búgin úıine shyǵaryldy. Aýyr jaǵdaıda bosanǵan kelinshek pen onyń perzentteri dárigerlerdiń jiti baqylaýynda bolǵan.
Shymkent qalasynyń turǵyny Áıgerim Anarqul 2025 jylǵy 28 qarashada júktiliktiń 33-aptasynda ota jolymen úshem qyzdy dúnıege ákeldi. Sábılerdiń týǵan kezdegi salmaǵy 1300-den 1495 gramǵa deıin boldy.
— Náresteler dúnıege kelgen alǵashqy táýlikte qalalyq perzenthanadaǵy jansaqtaý bóliminde dárigerlerdiń baqylaýynda boldy. Keıin úshem qyzdar 39 kún boıy náresteler patologııasy bóliminde em qabyldady, — dep habarlady oblystyq densaýlyq saqtaý basqarmasy.
Qazirgi ýaqytta sábılerdiń salmaǵy 2175 gramnan 2365 gramǵa deıin artty. Dárigerler ananyń jáne jańa týǵan nárestelerdiń jaǵdaıyn turaqty dep baǵalap, olardy úıine shyǵardy.
Ata-anasy Habıba, Halıma jáne Hamıda dep at qoıǵan jańa týǵan qyzdar anasynyń janynda, jaǵdaılary turaqty. Olar ana sútimen jáne qosymsha taǵamdarmen tamaqtanyp jatyr.
Dárigerler ýaqytyly kórsetilgen medıtsınalyq kómektiń jáne jańadan bosanǵan ananyń tózimdiliginiń arqasynda úshemniń statsıonardan tys ómirge sátti beıimdelgenin atap ótti.
— Kishkentaı perishtelerge myqty densaýlyq pen uzaq, baqytty ǵumyr tileımiz, — dedi dárigerler.
Eske sala ketsek, 2025 jyly Shymkent qalasynda 27 457 sábı dúnıege keldi. Onyń 286-sy — egiz jáne 5-eýi — úshem.
Budan buryn shymkenttik dárigerler salmaǵy 700 gramm náresteni aman alyp qalǵanyn jazǵan edik.