Habıb Nýrmagomedov Shavkatty chempıondyqqa laıyq kórmeı me

Qazaqstandyq faıter Shavkat Rahmonov UFC 310 jarysynyń aıasynda ırlandııalyq Ien Garrıdi jeńgen soń kelesi jekpe-jeginde tegi palestınalyq Belal Muhamedpen chempıondyqqa talasýǵa tıis.

Alaıda jýyrda UFC-diń jeńil salmaqtaǵy eks-chempıony, tanymal daǵystandyq Habıb Nýrmagomedov Belalmen jekpe-jek ótkizýge qazaqstandyq emes, nıgerııalyq Kamarý Ýsman laıyq ekenin jetkizdi.

Degenmen Kazinform tilshisine Shavkat Rahmonovtyń ókili Baýyrjan Ótálıev eks-chempıonnyń pikiri negizsiz ekenin aıtty.

– Kelesi jekpe-jek mindetti túrde Shavkat Rahmonov pen Belal Muhamed arasynda jartylaı orta salmaq chempıondyǵyna talas retinde ótedi. Bizdiń shamalaýymyzsha, sáýir, mamyr ne maýsym aıynda bolýy kerek. Meniń oıymsha, Shavkat Belaldy ýaqytynan buryn jeńe alady, – dedi ol.

Sonymen qatar Ótálıev osynyń aldynda Belal jaraqatyn syltaýratyp, Shavkatpen jekpe-jekke shyqpaı qalǵanyn eske túsire kele, Habıb Nýrmagomedovtiń pikirine kelispeıtinin sóz etti.

– Belal Habıb Nýrmagomedovtiń komandasymen birge jattyǵady. Olar keıde aılaǵa barýdan qashpaıdy. Ýaqyt ótkizedi, ózderine yńǵaıly sátti kútedi. Shavkattyń potentsıaly qanshalyqty myqty ekenin olar jaqsy biledi, seskenedi. Olardyń aıtýynsha, chempıondyqqa talasty Belal Shavkatpen emes, Kamarý Ýsmanmen sarapqa salý kerek eken.

Bilesiz be, olar tek ońaı nusqany tańdap otyr. Belalmen shyǵýǵa Kamarý Ýsmannyń ózi de kelispeıdi. Keıingi 3 kezdesýinde Ýsman jeńilip qalǵan, – dedi Dar Pro Team komandasynyń jetekshisi.

Suhbattyń tolyq nusqasyn myna jerden oqı alasyzdar.

Sondaı-aq Shavkat Rahmonov nege ırlandııalyq qarsylasy Ien Garrıdy áreń jeńgenin de túsindirgen bolatynbyz.