Habıb Nýrmagomedov pen onyń bapkeri Nurlan Noǵaevtyń qabyldaýynda boldy
ATYRAÝ. QazAqparat - Búgin Atyraý oblysynyń ákimi Nurlan Noǵaev jeńil salmaqtaǵy UFC chempıony Habıb Nýrmagomedovpen jáne onyń bapkeri, erkin kúresten KSRO sport sheberi, RF eńbegi sińgen bapkeri Abdýlmanap Nýrmagomedovpen kezdesti, dep habarlaıdy QazAqparat tilshisi.
Álemge áıgili sportshylar Atyraýǵa GFC 17 jáne Jaýynger birlesken týrnıriniń qurmetti qonaqtary retinde keldi.
«Qaı jerde de sizderdi kórgisi kelip, kútetinder kóp. Bul – úlken qurmet, mártebe, eren eńbek, qajyr-qaırattyń nátıjesi. Abdýlmanap Magomedovıch, aldymen, áke retinde jáne bapker retinde bul sizdiń eńbegińiz, sizdiń jeńisińiz. Árbir ata-ana óziniń balalarynyń úzdik bolǵanyn, maqtalǵanyn, sonymen qatar adamshylyq qasıetterin saqtaǵanyn qalaıdy.Siz osyǵan qol jetkizip otyrsyz. Habıb syndy ul tárbıelep ósirdińiz, basqa da jastarǵa tárbıe berip otyrsyz. Bul – ózgege ónege. Sizge rızashylyǵymdy bildiremin», - dedi Nurlan Noǵaev.
Óńir basshysy sportqa sonyń ishinde, ulttyq sport túrlerine zor kóńil bólinip otyrǵanyn, sport adamnyń eń jaqsy qasıetterin shyńdaıtynyn atap ótti.
«Ómir degen kúres, ár adam kún saıyn túrli qıyndyqtarǵa ushyrap otyrady. Olardy jeńý úshin rýhanı qýat qajet. Habıbti quttyqtap óteıin. Siz ótkizgen jekpe-jekterdiń eshqaısysy da ońaı bolǵan joq. Eshkim de jeńilgisi kelmeıdi, árkim-aq jeńemin degen maqsatpen shyǵady. Jeńiske degen jigerińizdiń arqasynda jeńimpaz bolyp júrsiz. Aldaǵy ýaqytta da jańa tabystar, jeńister tileımin. Jaqsy nátıjege qol jetkizý úshin kóp nárseden bas tartyp, qatań tártipti ustaný qajet», - dedi oblys ákimi.
Óz kezeginde Habıb Nýrmagomedov atyraýlyq sheberler ataqty sportshylardan esh kem túspeıtinin aıtyp ótti.
«Bizge birneshe jyl boıy Atyraýdan kelip, birge jattyǵyp júrgen sportshylar bar. Búgin sharshy alańǵa shyǵatyn jigitterdiń barlyǵyn derlik tanımyz. Shyn máninde, sizderde sport jaqsy damyǵan. Jalpy, Qazaqstanda sportqa degen sonyń ishinde, sporttyń jaýyngerlik túrlerine degen úlken ynta baıqalady», - dedi H. Nýrmagomedov.
Al Abdýlmanap Nýrmagomedov Atyraý oblysynyń ákimi Nurlan Noǵaevqa ulynyń úlken jekpe-jekterdegi qupııasyn ashyp, qazaqstandyq sportshylar týraly pikirin bildirdi.
«Men sizge bir qupııany ashaıyn: ulym torǵa kirip, tanystyrý rásimi bolǵannan keıin dál jekpe-jek bastalar aldynda maǵan jaqyndap, kúlimsirep: «Áke, qobaljyp tursyń ba?», - dep suraıdy. Árıne, qobaljımyn. Óziń áke bolyp, ulyń osyndaı tordyń ishinde kúreskende qandaı kúıde bolar ekensiń degen oı keledi«, - dep syr shertti ataqty bapker.
»Erkin kúresten Álem chempıonaty ótkende Qazaqstan Reseıden keıin ekinshi oryn alǵan bolatyn. Shynymdy aıtsam, Qazaqstan erkin kúresten besinshi, altynshy oryn alar dep oılaǵanmym. Bokstan myqty ekenin, úzdik úshtiktiń qataryna kiretinin bilemin ǵoı. Al, bul jaǵdaıda men tańdanyp qaldym. Demek, sizderde jaqsy perspektıva bar. Sport joǵary deńgeıde damyǵan. Basshylyq úlken kóńil bólip otyr. Óte talantty jastar bar, bapkerlik quramnyń deńgeıi joǵary«, - dedi Abdýlmanap Nýrmagomedov.
Eske sala keteıik, Atyraýda 25-27 qyrkúıek kúnderi «Zhastar Sport Fest» sport festıvali ótip jatyr. Buqara halyq arasynda sportty nasıhattaýǵa arnalǵan jobanyń aıasynda kóptegen sporttyq is-sharalar uıymdastyryldy. Habıb Nýrmagomedov, Abdýlmanap Nýrmagomedov, Islam Mahachev, Zabaıra Týhýgov sııaqty jekpe-jektiń tanymal sheberleri, Olımpıada chempıondary Roman Vlasov, Tagır Haıbýllaev, belgili qazaqstandyq sportshylar Maksım Rakov, Sergeı Morozov, Damır Ismagýlov, Shavhat Rahmonov sharaǵa qurmetti qonaqtar retinde shaqyryldy. Úsh kúndik festıval 27 qyrkúıekte «Gorilla Fighting Champioship 17» álemdik týrnırimen aıaqtalady.
Buǵan deıin Abdýlmanap Nýrmagomedov atyraýlyq jastarmen kezdeskenin jazǵan bolatynbyz.
