Habıb Nurmagomedov qatysqan týrnırde polıtseıdi ıterip jibergen uıymdastyrýshy 10 táýlikke qamaldy

AQTAÝ. QazAqparat - Aqtaýda reseılik sportshy Habıb Nurmagomedov qonaq retinde qatysqan týrnırde polıtsııa qyzmetkerin ıterip jibergen adam 10 táýlikke qamaldy, dep habarlaıdy QazAqparat tilshisi Mańǵystaý oblysy polıtsııa departamentiniń baspasóz qyzmetine silteme jasap.

«Vıdeodaǵy adamnyń kim ekeni anyqtalyp, Aqtaý qalasynyń polıtsııa basqarmasyna jetkizildi. Azamatqa qatysty Ákimshilik quqyq buzý kodeksiniń 434-baby 1-bóligine sáıkes ákimshilik hattama toltyryldy. Ákimshilik sottyń sheshimimen Aqtaý qalasynyń arnaıy qabyldaý ornynda 10 táýlikke qamaýǵa alý týraly qaýly qabyldandy» - dep málim etti Mańǵystaý oblysy ishki ister departamentiniń baspasóz qyzmeti.

Esterińizge sala keteıik, 16 shilde kúni Aqtaýda aralyq jekpe-jekten týrnır ótip , oǵan 15 myńǵa jýyq kórermen jınalǵan edi.

Osy týrnırge mártebeli meıman retinde shaqyrylǵan Habıb Nurmagomedovke umtylǵan adamnyń polıtsııa qyzmetkerin ıterip jibergeni túsip qalǵan vıdeo jelide qyzý talqylanǵan bolatyn.

Keıinnen ol adamnyń osy týrnırdi uıymdastyrýshylardyń biri - Arman Toǵaev ekeni belgili boldy.