Habarsyz ketken qaraǵandylyq boıjetken astanadaǵy saıabaqtan tabyldy
NUR-SULTAN. QazAqparat - Astana polıtseıleri «Kezbe» atty jedel profılaktıkalyq sharalaryn ótkizdi, dep xabarlaıdy «QazAqparat» Nur-Sultan qalasy polıtsııa departamentiniń baspasóz qyzmetine silteme jasap.
Reıdtiń maqsaty - xabar-osharsyz ketkenderdi izdeý, qylmyskerlerdi ustaý jáne turǵylyqty mekenjaıy joq tulǵalardy, qańǵybastardy taýyp, tirkeý.
Polıtseıler jertólelerdi, káriz júıelerin, qudyqtardy, úılerdiń tóbelerin, qoqys tastaý oryndarynda izdeý jumystaryn júrgizdi. Turǵylyqty mekenjaıy joqtardyń tulǵasy anyqtalyp, tirkeýge alyndy. Qujaty nelikten joq ekenin túsindire almaǵandar polıtsııa bólimine aparylyp, saýsaq izderi alyndy.
Jalpy, 186 adam tirkeldi. Sonyń beseýi elorda polıtsııa departamentiniń qabyldaý-taratý mekemesine ornalastyryldy.
Polıtseılerdiń aıtýynsha, turǵylyqty mekenjaıy joqtar jıi qylmys qurbany bolady nemese ózderi sondaı qadamǵa barady.
Reıd kezinde ishinde TMD elderinen kelgen eki azamaty bar 11 qylmysker ustaldy.
Sonymen qatar xabar-osharsyz ketken 7 adamnyń qaıda júrgeni anyqtaldy. Elordadaǵy saıabaqtan Qaraǵandy oblysynyń PD xabar-osharsyz ketken dep jarııalaǵan 20 jasar boıjetken tabyldy. Onyń týystaryna qyzdyń qaıda ekeni týraly xabar berildi.
