Habarovskidegi týrnır: Sáken fınalǵa shyqty, Muhamedsabyr reseılik boksshydan jeńildi

ASTANA. KAZINFORM — Reseıdiń Habarovsk qalasynda ótip jatqan bokstan Konstantın Korotkovty eske alýǵa arnalǵan týrnırde Sáken Bıbosynov (54 keli) fınalǵa joldama aldy. 

2021 jylǵy álem chempıony jaraqat saldarynan birshama ýaqyt bokstan qol úzip alǵan edi. Soǵan qaramastan týrnır barysynda jankúıer kóńilinen shyǵatyn deńgeıde jekpe-jek kórsetip jatyr. 

Jartylaı fınalda ol ózbekstandyq Farıezbek Dýsmatovty 5:0 esebimen qapy qaldyrdy. Farıezbek — qos dúrkin Olımpıada chempıony Hasanboı Dýsmatovtyń týǵan inisi. Hasanboı da atalǵan týrnırge kelgenimen, shırek fınalda jolyn inisine bergen edi. 

Endi otandasymyz fınalda reseılik Denıs Palshınmen qolǵap túıistiredi.

Sáken Bıbosynov 1992 jyly dúnıege kelgen. Álem chempıonatynda 2021 jyly altyn alsa, 2019 jyly qola júldeger boldy. 2020 jyly Tokıo Olımpıadasynda úzdik úshtikten kórindi.

Sondaı-aq el quramasynan Muhamedsabyr Bazarbaıuly (67 keli) jartylaı fınalda reseılik Egor Kozorezovke 0:5 esebimen jeńilip, týrnırdiń qola medalin qanaǵat tutty.

Qazirge deıin el quramasynan Rımma Volosenko (60 keli) ózbekstandyq Rashıda Tagırovany 5:0, Uldana Taýbaı (66 keli) taǵy bir qazaqstandyq Arýjan Jańabaevany 4:1 esebimen jeńip, bas júldeni sarapqa salýǵa múmkindik aldy.

Jarystyń atalǵan satysynda Jandos Qydyralıev (63.5 keli) ózbekstandyq Abdýllo Madamınovqa 0:5 esebimen jol berdi. 

Aıta keteıik, halyqaralyq týrnır bıyl on altynshy ret uıymdastyrylyp otyr. Baıraqty báseke 20 sáýirge deıin jalǵasady.

Eske salsaq, 17 sáýirdegi jekpe-jekterde 7 qazaqstandyq boksshy kelesi kezeńge ótti.