«Habardan» syrly suhbat pen sazdy áýenge toly jańa joba shyǵady
NUR-SULTAN. QazAqparat – «Habar» telearnasynan jýyrda áýezdi ánge, ádemi áńgimege, syrly suhbatqa negizdelgen jańa joba kórermenge jol tartpaq, dep habarlaıdy QazAqparat.
Baǵdarlama - qoǵamǵa qyzyqty taqyryptardy qamtyp, kózi qyraǵy kórermendi sazben sýsyndatyp, eńbegi elenýge laıyq dep tanylǵan jandarmen syrly suhbat júrgizedi. «Tórletińiz» dep atalatyn aqparattyq-sazdy, tanymdyq, oıyn-saýyq teletýyndysyn - «Habar» telearnasynan 7 qazannan bastap, ıaǵnı búginnen bastap, saǵat 16.00-de tamashalaı alasyzdar.
Jas ereksheligin talǵamaıtyn, kórermen kóńiline kúndizgi kúı syılaıtyn «Tórletińiz» oıyn-saýyq, aqparatty-sazdy, kóńilashar jobasy jýyrda kórermen nazaryna jol tartady. Jobanyń ár shyǵarylymy – elimizge belgili, eń bedeldi tulǵalardyń ómirindegi, ónerindegi jańalyqtarmen kórermendi tanystyryp, eldi eleń etkizetin oqıǵalardy talqylap, qoǵamdaǵy máselelerdi qaýzaıdy.
«Tórletińizdiń» tańdaýly meımany - óziniń jeke ómiri jaıly, tájirıbesi, ónerindegi kúıinishi men súıinishi jaıly syr tarqatady.
Ónerindegi jańalyǵymen bólisip, jańa týyndysynyń telekórermender aldynda tusaýyn kesedi.
Tórletińizdiń meımany - búginde úlken talqylaýlarǵa ıe bolyp júrgen jandardyń qataryndaǵy aıtys aqyndar, ánshi, akter, sazger, kúıshi, jazýshy, rejısser, qoǵam qaıratkerleri, ǵalymdar men akademıkter, bılik minberiniń ókilderi, jýrnalıster men metsenattar, sportshylar, zergerler, qolónershiler, dızaıner, modeler, kásipker, sýretshi, kaskader, bloger, tsırk qyzmetkerleri, ınternet arqyly tanylǵandar bola alady.
Baǵdarlama júrgizýshileri – kelgen qonaqqa ótkir suraqtaryn, kútpegen jerden tótesinen qoıý arqyly – saýaldaryna shynaıy jaýap alady. «Tórletińizdi» tizgindeýshiler - Ramazan Amantaı, Maqpal Qasenova, Qýanysh Mamytqalıev, Darıǵa Badyqova.
Kórigi qyzǵan kóńilashar «Tórletińiz» jobasyn – «Habar» telearnasynan, 7 qazannan bastap,ıaǵnı búginnen bastap, saǵat 16.00-de tamashalaı alasyzdar.
