«Habar» telearnasynyń naýryz aıyndaǵy tusaýkeserleri

18 naýryz kúni «Habar» arnasynda  «Chempıon» atymen  jańa sporttyq-saýyqtyrý dýmanynyń  tusaýy kesiledi.

Sharshy alańǵa tanymal ánshiler, teatr jáne kıno akterlary, tsırk ártisteri men telejúrgizýshiler shyqpaq. Bylǵary qolǵap ónerin bir adamdaı meńgergen 16 sheberdiń qatarynda: Rınat Maltsagov, Arystan Myrzagereev, Shamsı, Azamat Satybaldy, Renat Basıtov, Aıqyn Tólepbergen, Ánýar Shymyrqulov, Áset Májimbekov, Jasulan Dáribaev, Erkin Máýlenov, Ernar Jumataev, Janatbek Báıtekov, Baǵlan Joldasov, Berik Aıtjanov, Baǵlan Ábdraıymov, Dastan Orazbekovter sekildi azamattar bar. Rıngtegi júrgizýsh - Vladımır Rerıh, al kommentatordyń mindetin Arman Dúısenov atqarady.

Baǵdarlamanyń ár shyǵarylymynda kórermen 4 jekpe-jektiń kýási bolady. Ár match árqaısysy 1,5 mınýttan turatyn 3 raýnd júıesinde ótkiziledi. Synǵa qatysýshylar - aýyr jáne jeńil salmaq dárejesine qaraı suryptalǵan. Týrnır «barlyq qatysýshynyń óz ara kezdesý mindettiligi» júıesinde ótkiziledi. Jekpe-jekter qortyndysy boıynsha eń kóp jeńiske jetken eki boksshy jartylaı fınalǵa shyǵady. Úshinshi - tórtinshi úshin ótkiziletin urystardyń qatysýshylary da jeńis sany boıynsha anyqtalmaq. 

Jobanyń avtorlary Qazaqstannyń sporttaǵy tabystary, atap aıtqandaǵy bokstaǵy jetistikterimizdiń jastardyń sportpen aınalysyp, salaýatty ómir saltyn tańdaý jáne patrıottyq rýhta tárbıelenýine yqpal eterine senim bildiredi.

Sporttyq-televızııalyq rıngtegi Chempıon ataǵyna óner adamdary esebinde tanylǵandyqtan da kópshilikke jandary názik, kóńilderi jumsaq sekildi kóriner azamattar talasady. Bul talasta shyǵarmashylyq adamdarynan tózimdilik pen tabandylyq talap etiledi. Synǵa túsken 16 sheber ózderin, qajet bolsa jaqyndary men týǵan elin deqorǵap qalýǵa qabiletti ekendikterin dáleldeıdi.

Rıngke shyqqan árbir boksshy tartysty talas arqyly kimniń soqqysy joıqyn, qaıtpas qaısar ekenin anyqtaıdy. Sharshy alańdaǵy ymyrasyz básekege qatysar aldynda barlyq qatysýshy boks óneriniń qyr-syryn meńgerýge múmkindik bergen tyńǵylyqty dene shynyqtyrý jáne teorııalyq daıyndyqtan ótti. Jattyǵý jumystaryna jetekshilik jasaǵan Respýblıkaǵa eńbegi sińgen bapker Davıd Kostoev.

Televızııalyq boks jekpe-jeginiń Chempıony ataǵyn kim jeńip alady? Ár jeksenbi kúni saǵat 19.00 da «Habar» arnasyndaǵy  «Chempıon» sporttyq - saýyqtyrý dýmanyn tamashalańyzdar!

Naýryz merekesine arnalǵan syı-tartý. «Aldar Kóse» telehıkaıasy.

Dala kezip, talaı qyzyqqa sebepshi bolǵan Aldar jaıly kim bilmeıdi? El arasynda ańyzǵa aınalǵan súıikti keıipker jaıly jańa telehıkaıa qazaq tilinde kórsetiledi. Tildi meńgermegen kórermender úshin hıkaıa túsinikti bolý úshin sýbtıtrlar salynǵan. Fılmge Qazaqtyń Muhtar Áýezov atyndaǵy drama teatrynyń akterlary tústi. «Aldar Kóse» «Habar» Agenttiginiń týyndysy.

20 naýryz.  «Qudiretti Súleımen».

Tartymdy, boıaýy mol, kostıýmdi dramaǵa negizdelgen túrik telehıkaıasynda Osman ımperııasynyń negizin qalaýshylardyń biri, tarıhta Qudiretti Súleımen atymen qalǵan sultannyń ómiri jaıly baıandalady. Synshylar bul kópserııaly fılmdi televızııalyq uly týyndylardyń sanatyna jatqyzady.

21 naýryz. «Birligimiz jarasqan» - «Nash obşıı dom» merekelik jobasynyń tusaýkeseri.

Baǵdarlamada alyp qaladaǵy aýlalardyń birinde ornalasqan bir úı turǵyndarynyń ómiri jaıly baıandalady. Túrli ult, túrli kásip, ártúrli jastaǵy, ómir jaıly kózqarastary áralýan jandardyń basyn biriktirer bir uǵym - olar bir úıdiń, bir qalanyń  jáne Qazaqstan atty eldiń turǵyndary. Demek, bul úı turǵyndarynyń tirshiligi - tutas bir el tirliginiń: múdde ortaqtyǵy, ózara úndestik, ortaq qýanysh pen qamqorlyq, tyǵyz qarym-qatynastyń kórinisi. «Birligimiz jarasqan» baǵdarlamasynda óz salasynda tolaǵaı tabysqa jetken: mádenıet, sport, shoý-bıznes ókilderi shaǵyn epızodtarda ózderin ózderi somdaıtyn bolady.

23 naýryz. «Habarstars» telejobasynyń tusaýkeseri

Otbasylyq kórsetilimge arnalǵan «HabarStars» sazdy habary efırde «Dýdar-aı» saýyqtyq baǵdarlamasynyń ornyna keledi. El arasynda jasy egde tartqan kórermenderdiń qazirgi mýzykalyq aǵymdar men baǵyttarǵa narazylyq bildirip, óz zamanyndaǵy áýenderdi maqtaıtyny jasyryn emes. Árıne, jastardyń mundaı pikirlerge óz aıtarlary bar. «HabarStars» jobasynda osy másele keńinen talqylanady. Baǵdarlama maqsaty - qos býyn ókilderiniń arasyndaǵy talas, ata-ana men balanyń talǵamǵa, qaı aǵymnyń, qaı dáýir mýzykasynyń maǵynalylyǵyna qatysty pikirlerin anyqtap, toqsan aýyz sózdiń tobyqtaı túıinin tabý. Ózara túsinistikke qol jetkizý, bir-birleriniń tańdaýyn baǵalaý.

Baǵdarlamaǵa tek Qazaqstan estradasynyń juldyzdary shaqyrylady. Habarda tek halyq ánderi shyrqalmaq!