«Habar» telearnasynda jańa respýblıkalyq telebaıqaý - «Jigit sultany»
ASTANA. 12 sáýir. QazAqparat - 13 sáýir kúni «Habar» arnasynda (saǵat 22.20-de) «Jigit sultany» jańa respýblıkalyq telebaıqaýy bastalady.
Baǵdarlama qatysýshylaryna qoıylǵan basty talaptar: jasy 18 ben 29 aralyǵynda, boıynyń uzyndyǵy 170 sm-den kem emes, qazaq tilinde erkin sóıleı alatyn, qazaq dástúri men tarıhynan sýsyndaǵyn, ónerli ári sportpen shynyqqan azamat bolý.
Uıymdastyrýshylardyń aıtýynsha, qazirgi tańda elimizde názik jandylar qatysatyn kóptegen baıqaýlar bar: «Qazaq arýy», «Qazaqstan arýy», «Qazaqstan top-modeli», «Qazaq hanshaıymy» jáne t.b. Biraq er jigitterge ǵana arnalǵan baıqaýlar bizdiń elde ázirge bolmaı tur. Mundaı baıqaý osydan 20 jyl buryn, 1993 jyly alǵash ret jáne sońǵy ret ótken bolatyn. Ol doda barshamyzǵa M.Áýezov atyndaǵy Qazaq akademııalyq drama teatrynyń akteri, telejúrgizýshi jáne ánshi Jalǵas Tolǵanbaı atty jańa esimdi syılaǵan bolatyn. Fınalda Jalǵas avtokólikti aýyzben birneshe metrge súıregeni kóptegen otandastarymyzdyń áli esinde.
Aqpan aıynda Astana qalasynda baıqaýǵa qatysýǵa úmitkerler arasynda irikteý ótti. Qazylar alqasy báıgege qatysýǵa laıyq degen 16 úmitkerdi tańdap aldy. Al sáýir aıynan bastap qatysýshylar án saıysy, akterlik sheberlik, tsırk óneri, bı jarysy, ulttyq qolóner, sporttyq báseke jáne t.b. saıystarda baqtaryn synaıdy. Ár baıqaý kúninen keıin bir úmitker jobadan shyǵyp otyrady. Fınaldyq jarysta úzdiktiń úzdigi ataný úshin 6 adam synǵa túsedi dep josparlanýda. Júldegerlerdi qundy syılyqtar kútip tur, al bas báıge - avtokólik.
Qazylar alqasy - ár baǵdarlamanyń taqyrybyna saı shaqyrylǵan belgili kásiptiń maıtalmandary. Jobanyń alǵashqy shyǵarylymdary, ıaǵnı 13 sáýir men 20 sáýirde efırge shyǵatyn baǵdarlamalar kóptegen qyzyqty oqıǵalardyń kýási bolǵan irikteý kezeńine arnalady.
