Habar» telearnasynda - «Oskar-2015»
ASTANA. QazAqparat - 23 aqpanda saǵat 23:00-de «Habar» telearnasynda eń bedeldi «Oskar-2015» kınosyılyǵynyń resmı marapattaý saltanaty telenusqasynyń eksklıýzıvti kórsetilimi ótedi.
Jyl saıyn «Oskar» kógildir ekranǵa túrli elderdiń kıno maıtalmandaryn jınaıdy. 2014 jyly AQSh-ta saltanatty keshti 43 mln. adam kórgen edi, al beıresmı málimetter boıynsha álemdik aýdıtorııanyń bul kórsetkishi tipti mıllıardqa jetken bolatyn.
«Qazaqstanda sapaly kınony baǵalaýshy adamdardyń sany az emes, sondyqtan «Habar» arnaıy osyndaı aýqymdy sharany jylda kórsetýde. Marapattaý saltanaty Astana ýaqytymen 23 aqpanda saǵat 5-te bastalady. Kórermenderimizdiń yńǵaıyna biz beıimdendirilgen telenusqany dál sol kúni keshkisin barlyq Azııalyq jáne Shyǵys-Eýropalyq arnalarmen birge kórsetemiz. Kórsetilim úlken kıno áýesqoılardyń kóńilinen shyǵady dep úmittenemiz»,- deıdi «Habar» agenttiginiń baǵdarlama dırektory Sandýǵash Rahymjanova.
Osy jyly «Úzdik kıno» nomınatsııasyna 8 týyndy marapatqa usynyldy: «Otel «Grand Býdapesht», «Eresektik», «Taıaqtyń kúshimen», «Berdmen», «Barlyǵynyń teorııasy», «Imıtatsııa oıyny», «Snaıper», «Selma».
Eń úzdik erler roli úshin «Oskar» júldesine barynsha talantty kelesi akterler úmittenedi - Stıv Kerell («Túlki aýlaýshy») Bredlı Kýper («Snaıper»), Benedıkt Kamberbetch («Imıtatsııa oıyny»), Maıkl Kıton («Berdmen») jáne Eddı Redmeın («Barlyǵynyń teorııasy»). Bredlı Kýper úshin bul úshinshi nomınatsııa, al qalǵan akterler birinshi ret mundaı marapatqa ıe.
Eń úzdik áıelder roli úshin úmitkerler arasynda 2007 jyly kınosyılyqtyń laýreaty Marıon Kotıııar («Eki kún, bir tún»), Felısıtı Djons («Barlyǵynyń teorııasy»), Djýlıann Mýr («Áli de sol Elıs»), Rozamýnd Paık («Joǵalǵan») jáne Rız Ýızerspýn («Jabaıy»).
Úsh Oskardyń ıegeri Merıl Strıp bıyl nomınatsııa sany boıynsha kóshbasy tizginin berik ustaýda, ıaǵnı 19 nomınatsııanyń ıegeri osy jyly da «Ekinshi plandaǵy úzdik aktrısa» sanatynda baq synamaq.
Sonymen birge shet tilinde eń úzdik fılmder nomınatsııasyna ilikken týyndylarǵa kóptegen pikirler jınaǵan reseılik Andreı Zvıagıntsevtiń «Levıafan» kınosy. Oǵan básekeles bolatyn fılmder arasynda «Ida» (Polsha), «Mandarıny» (Grýzııa/Estonııa), «Tımbýktý» (Mavrıtanııa), «Jabaıy oqıǵalar» (Argentına).
Uıymdastyrýshylardyń aıtýynsha, osy jyly kórermenderdi kóptegen tosyn syılar kútedi, atap aıtqanda, «Dolbı» teatrynyń sahnasynda «Maroon 5» tobynyń frontmeny Adam Levaın, Djon Ledjend, Anna Kendrık, Rıta Ora, Ledı Gaga jáne Djenıfer Hadson sııaqty juldyzdar marapatqa usynylǵan kınolardyń óleńderin oryndaıdy.
87-shi marapattaý saltanatyn kórermenderge «Qalaı men Sizderdiń analaryńyzdy kezdestirdim» atty telehıkaıa boıynsha tanymal bolǵan akter Nıl Patrık Harrıs júrgizedi. Harıstiń ótkir oıy, tapqyrlyǵy, ánshilik jáne bıshilik daryndylyǵy uıymdastyrýshylardyń asa nazaryn aýdarǵan bolatyn. Marapattaý sharasynyń qazaqstandyq nusqasynyń translıatsııasyn túsindirý ataqty kınosynshy, kino-pravda.kz saıtynyń ortaq quryltaıshysy Dmıtrıı Mostovoıǵa jáne «Habar» telearnasynyń júrgizýshisi Nursultan Qurmanǵa tapsyrylady.
Sonymen qatar, «Habar» telearnasy kınosyılyqtyń kórsetilimine oraı «Oskar» nomınatsııasyna ıe bolǵan jáne laýreaty atanǵan fılmderdiń úshkúndik marafonyn uıymdastyrady. Kórermender ótken jyldardyń úzdik toptamasyn tamashalaı alady: 20 aqpanda saǵat 21.30-da - «Quldyqtaǵy 12 jyl», 21 aqpanda saǵat 22.00-de - «Shoýshenkadan qashý» jáne 22 aqpanda saǵat 22.00-de - «Jaýynger».
