«Habar» telearnasy kórermenderine «Taǵy da súı» melodramasyn usynady
ASTANA. QazAqparat - Kúzgi maýsymda «Habar» arnasy kórermenderine birneshe otandyq teleserıal usynady. Solardyń biri rejısser Ashat Musabaıdyń «Taǵy da súı» melodramasy. Bul mahabbat pen sezim sergeldeńi, jolyńda kezdesken qansha kedergiler men synaqtarǵa qaramastan ómir súrýge degen qulshynysty sýretteıtin kartına.
«Jalpy adam ómirde ártúrli mahabbat sezimderin bastan ótkeredi. Keıde súıgen qyzy bola tura, basqa bireýdi unatyp qalady. Bizdiń baıandaıtyn oqıǵamyz osy týraly. Bir jas jigittiń mahabbat hıkaıasy» - deıdi serıal týraly fılmniń rejısseri Ashat Musabaı.
Aıan - jasy 25-ke jańa shyqqan symbatty, bilimdi jigit. Ákesi jarnama agenttiginiń basshysy, bıznesmen. Anasy florıst. Súıgen qyzy Asyl eki jyl buryn jol apatynan qaıtys bolyp, basty keıipker kúızeliske ushyraǵan. Oǵan qosa, kezinde Asyldy jetim qyz dep qabyldaǵysy kelmegen ákesimen qarym-qatynasy da nashar. Asyl kóbelekterdi qatty jaqsy kóretin. Sol sebepti Aıan súıgeniniń taǵdyryn kóbelektiń qysqa ǵumyryna teńep, moıynsunýǵa májbúr bolady.
Ýaqyt óte kele jan jarasynan arylǵan ol Mereı degen arýmen bas qosady. Biraq oǵan degen taǵdyrdyń syıy taýsylmapty. Aıan Asyldy qaıta jolyqtyrady. Osylaı oqıǵa shıelenise túsedi.
Kartınaǵa jas akterler shaqyrylǵan. «Jańa akter, jańa aktrısalarmen jumys istep, elge áli tanylmaǵan jańa beınelerdi kórsetkimiz keldi. Basty róldegi Aıandy Shalqar Qudaıbergen degen jigit somdaıdy. Almaty qalasynyń týmasy. Qyzdarǵa keletin bolsaq, Adına Bajan jáne Astanadan arnaıy shaqyrtylǵan Nursaýle Áýbákirova. Nursáýle Shabyt ýnıversıtetiniń stýdenti»- deıdi Ashat Musabaı.
Bir qyzyǵy, basty rólde oınaıtyn Shalqar Qudaıbergen - fızıka mamandyǵy boıynsha bilim alyp júrgen stýdent. «Kınodaǵy tájirıbem ómirlik kózqarastarymnyń qalyptasýyna áser etti», - deıdi ol. «Ózimniń oıymdy tolyq jetildire bastadym. Adamǵa degen syılastyǵym, adamgershiligim, úlkenge degen qurmetim, kishige degen kishipeıildigim arta bastady. Eń bastysy, buryn men adamdardyń arasynda kishkene qysylatynmyn. Biraq osy ról meni ózgertti. Sebebi keıipkerim ashyq adam», - deıdi Shalqar Qudaıbergen.
Taǵy serıalda Ádiljan Shombalov, Aızada Satybaldıeva, Zarına Omarova jáne basqa akterler oınaıdy.
12 bólimdi týyndy Almaty qalasynyń eń kórikti jerlerinde túsirilgen.
«Jastar týraly serıal bolǵandyqtan ádemi lokatsııalar tańdaldy. Qyzǵaldaqtar alańy, áýe sharlarymen ushý, aspaly joldarymen júrý, ózen, kól, qaıyq, romantıkalyq atmosferany berýge tyrystyq. Qustar, kóbelek syndy tirshilik ıelerin shynaıy etip kórsetý úshin arnaıy grafıster shaqyrdyq. Kórermenge unar degen senimdemiz»- deıdi rejısser Ashat Musabaı.
10 qyrkúıekten bastap 21.30-da «Habar» telearnasynan «Taǵyda súı» serıalyn tamashalańyzdar!
