«Habar» bıyl úlken jeti otandyq telexıkaıany usynýdy josparlaýda

"Habar" agenttigi kúzgi telemaýsymda medıaxoldıngti transformatsııalaý boıynsha jumystar júrgizýde. Nátıjesinde telearnalardyń jumys formaty, kontenti jáne uıymdastyrý qyzmetteri ózgeredi.

"Habar" agenttigi aqparattyq-saraptamalyq baǵdarlamalarǵa, jańalyqtar qyzmetine basymdyq berip keledi. Bıylǵy jylǵy maýsymnyń ereksheligi - endi tańerteńgi jáne kúndizgi jańalyqtarymyz jabylyp, onyń ornyna 1 qyrkúıekten bastap, keshki 19:00-de qazaq tilinde, 21:00-de orys tilinde kúnine bir ret qorytyndy jańalyqtar shyǵyp jatyr. Basty ózgeris - jańalyqtardy biz aqparattyq shoý janrynda berýdi qolǵa aldyq. Bir kúnniń basty taqyryptary, ózekti máseleleri bizdiń taldamashy-jýrnalıster tarapynan tereń zerttelip, túrli pikirlerdi, túrli ustanymdardy berý arqyly jáne stýdııadaǵy júrgizýshi sarapshymen túrli baılanys formalaryn qoldaný arqyly kórermenge jol tartatyn bolady. 1 qyrkúıekten bastap, jańalyqtar jańa stýdııadan, jańa dekoratsııadan shyǵyp, kórermenderge usynylýda", - dedi agenttiktiń basqarma tóraıymynyń orynbasary Rınat Kertaev.

Sonymen qatar, onyń aıtýynsha, "Habar" agenttiginiń úlken dástúrge aınalǵan "Jeti kún", "Bıýro rassledovanıı", "Betpe-bet" arnaıy xabary ispettes baǵdarlamalar jańa maýsymda formasy men formaty ózgerip, jańa stılde shyǵa bastady.

"Agenttik áleýmettik baǵdarlamalarǵa mańyz berip otyr. Qyrkúıektiń basynan beri biz birneshe áleýmettik baǵdarlamalardy shyǵara bastadyq. Olardyń biri - "Bizdiń nazarda" degen joba. Biz kez kelgen turmystyq-áleýmettik máselelerdi búkil respýblıkadaǵy tilshiler qosynyn paıdalana otyryp, qoǵamdyq kózqaras turǵysynan zerttep, kórermenniń nazaryna usynatyn bolamyz. Ekinshi jobamyz - ol "Bilý mańyzdy". Ózderińiz bilesizder, elimizde túrli memlekettik baǵdarlamalar, qyzmet kórsetý baǵdarlamalary memleket tarapynan kóptep qabyldanýda. Zańǵa engizilip jatqan ózgerister, azamattarymyzǵa kúndelikti qabyldanatyn kerekti normatıvtik aktilerdi túsindirý, saýaldar bolsa, tıisti quzyrly organdardyń jaýap berýi - osy jobanyń basty maqsaty", - dedi R. Kertaev.

Jáne de "Habar" arnasy qurylǵan kúnen bastap, áleýmettik tok-shoýlar, qoǵamdyq tok-shoýlar jasaýdyń kóshbasshylarynyń biri bolyp sanalady. Burynnan kele jatqan "Bizdiń úı" tok-shoýy túrlenip, jańa formatta, jańa taqyryptarmen kórermenge jol tapsa, jańa maýsymnan bastap, "Davaıte govorıt" degen aptasyna úsh ret shyǵatyn áleýmettik-qoǵamdyq tok-shoýdy kórermenge usyný josparlanýda. Bul baǵdarlamalardyń basty maqsaty - xalyq pen memleket arasynda tıisti qurylymdar arasynda dıalog alańyn ornatý.

"Sondaı-aq "Habar" arnasy - otandyq televızııalyq serıaldardy túsiretin, osy óndiristi qolǵa alǵan elimizdegi negizgi arnalardyń biri. Biz bıyl jańa maýsymda úlken jeti otandyq telexıkaıanyń tusaýyn kesýdi josparlap otyrmyz. Qyrkúıek aıynyń 17-sinen bastap jańa serıaldardyń kerýenin "Ógeı júrek" atty jańa telexıkaıa bastaıtyn bolady. Bul jerde de biz áleýmettik máselege basymdyq berdik - jetim balalar máselesi. Balany asyrap alý máselesine erekshe basymdyq berip otyrmyz. Ózderińiz bilesizder, jetimin jylatpaǵan xalyqpyz. Ótkendegi "Baýyrjan", "Kúlásh", "Qustar áni" sııaqty serıaldardyń jalǵasy retinde elimizdiń myqty tulǵalaryna bıografııalyq serıaldardyń túsirilimin jalǵastyratyn bolamyz. Bıylǵy jylǵy bizdiń jasap otyrǵan syılyǵymyz - ol belgili kompozıtor, dańqty mýzykant Shámshi Qaldaıaqovtyń ómiri men shyǵarmashylyǵyna arnalǵan arnaıy serıal bolady. Ony bizdiń kórermender Táýelsizdik kúni qarsańynda kóre alady. Byltyr biz Abaı babamyzdyń qara sózderinde, pálsapasynda aıtylǵan oılaryna negizdelgen "Aqyldyń kilti" atty úlken ómir dastany, epopeıa jobasyn bastaǵan bolatynbyz. Bıyl onyń ekinshi maýsymy shyǵady", - dep túıdi sózin agenttik basshysynyń orynbasary.