«Habar» arnasynda rejısser Ermek Tursynovtyń fılmderiniń festıvali bastalady
ASTANA. QazAqparat - 22 qarashadan bastap «Habar» arnasynyń efırinde rejısser Ermek Tursynovtyń fılmderi usynylady, dep habarlanǵan telearna saıtynda.
«Ár jeksenbi saıyn rejısserdiń tanymal 5 kartınasy - «Kelin», «Shal», «Kenje, «Kempir» jáne «Jatty» tamashalaı alasyzdar! Kınofestıval 22 qarasha saǵat 17.00-de «Kelin» dramasymen bastalmaq», delingen habarlamada. «Habar» arnasy ár fılmdi kórseter aldynda kórermender nazaryna rejısser men akterlik quramnyń qatysýymen ótetin baǵdarlama usynady. Qazaqstandyq rejısser, stsenarıst Ermek Tursynov 1961 jylǵy 20 shildede Almaty oblysynda dúnıege kelgen. Ál-Farabı atyndaǵy QazUÝ-diń jýrnalıstıka jáne S.A.Gerasımov atyndaǵy Búkilreseılik memlekettik kınematografııa ınstıtýtynyń stsenarıı-kınotaný fakýltetin támamdady. Rejısserlik mansabyn 2008 jyly «Kelin» fılminen bastady.
