«Habar» arnasy Jańa jyl merekesi qarsańynda usynatyn baǵdarlamalaryn jarııa etti
ASTANA. QazAqparat - «Habar» arnasy jyldaǵy dástúr boıynsha Jańa jyl qarsańynda kórermenderge merekelik baǵdarlamalar ázirledi. Meıram kúnderi otbasylyq fılmder, qyzyqty jobalar, kontserttik baǵdarlamalar, balalarǵa arnalǵan bazarlyqtar efır ajaryn asha túsedi, dep habarlaıdy telearnanyń baspasóz qyzmeti.
28 jeltoqsan kúni saǵat 21.30-da «Mahabbat kafesi» kartınasy alǵash ret telekórermen nazaryna usynylady. Basty rólderde tanymal ánshi Erke Esmahan jáne akter Shárip Serik oınaıdy. 
Foto Google-dan alyndy
Fılmniń rejısseri Asqar Uzabaev. Otbasylyq komedııa jelisi boıynsha joldyń boıynda «Mahabbat» kafesi ornalasqan. Qaladan qashyp kelgen aspaz jigit jasyrynyp júrip, osy kafege jumysqa ornalasady. Sóıtip, Erke ekeýiniń arasynda sezim paıda bolady. Olardyń mahabbatynyń nemen aıaqtalǵanyn «Habar» telearnasynan kóre alasyzdar.
29 jeltoqsan kúni (saǵat 18.15) jyldyń eń «Qyzyq premııasy» tabystalady. Marat Oralǵazın men Erkebulan Myrzabek bastaǵan «Qyzyq Times» baǵdarlamasynyń shyǵarmashylyq ujymy qazaqstandyq shoý-bıznes ókilderin, akterler, júrgizýshiler men sportshylardy eń ózgeshe jetistikteri úshin marapattady. 
30 jeltoqsan kúni «Jyl tańdaýy 2018» ulttyq mýzykalyq televızııalyq jobasy kórermenge usynylady. Bul sharaǵa júzden asa óner ıesi qatysyp, 12 500 adam tamashalaǵan bolatyn. Keshti Roza Rymbaeva, Táýekel Músilim, Láılá Sultanqyzy, Ámre, Meıirjan Tórebaev, Dana Eseeva, Asha Mataı, Arman Qońyr, Aıgúl Múkeı, Rústem Omarov jáne Meıirhan Shernııazov júrgizdi. 
Baıqaýda túrli nomınatsııa boıynsha 20 óner ıesi marapattaldy. Olardyń arasynda Aıdana Medenova, Albına Shardarova, Qýandyq Rahym, Zırýza, Alem band, Nurbolat Abdýllın, Nurjan Kermenbaev, Beıbit Kúshqalıev, Álı Oqapov, Qanat Úmbetov, Mádına Sadýaqasova, Luina jáne basqa ánshiler bar. Denıs Ten, Sherhan Murtaza jáne Abdrahman Asylbekke arnalǵan arnaıy nómirler ázirlendi. 
Sondaı-aq keshke Túrkııa elinen Mýrad Ýapyrak jáne Qyrǵyzstannan Aıdana syndy ánshiler qonaqqa keldi. Mýzykalyq joba aıasynda «STAR FASHION SHOW 2018» sán baıqaýy ótti. Onda 16 dızaıner óz jumystaryn usynǵan edi. Osynaý qyzyqty jeksenbi kúni saǵat 22.00-de tamashalańyzdar.
31 jeltoqsan kúni Vıktor Gıýgo romanynyń jelisi boıynsha túsirilgen «Otverjennye» serıalynyń birinshi bólimi brıtanııamen qatar kórsetiledi. Teleserıalda XIX ǵasyrdyń basyndaǵy oqıǵalar sýretteledi. Jan Valjan - nan urlap sottalǵan qashqyn. Ol uzaq jyldardan beri polıtsııa ınspektory Javerden tyǵylyp júredi. Javer bolsa zańnyń ádildigine senedi, sondyqtan qashqyndy tutqyndaý ómiriniń basty isi dep esepteıdi. Sonymen qatar kartınada Jan Valjan úshin mańyzdy adamdardyń biri - Fantına esimdi áıeldiń qaıǵyly taǵdyry da baıandalady. Onyń nekesiz týǵan Kozetta esimdi qyzy bar. Fantına kóz jumǵan soń Jan Valjan Kozettany óz balasyndaı tárbıeleıdi. Oqıǵa 1832 jyly Parıj qalasynda ótken Maýsymdaǵy kóterilispen damı túsedi.
Kartına rejısseri - Tom Shenklend. Stsenarııin L.N.Tolstoıdyń romany jelisimen túsirilgen «Soǵys jáne beıbitshilik» serıalynyń stsenarııin jazǵan Endrıý Devıs jazdy. Jan Valjannyń rólin Domınık Ýest, ınspektor Javerdiń rólin Devıd Oıeloýo, Fantınany Lılı Kollınz somdaıdy.
Sonymen qatar 31 jeltoqsan kúni keshki 22.00-den bastap «Jańa jyldyq qarbalas» shoýy bastalady. Oqıǵa Astanalyq jýrnalıster jınalǵan Qazmedıa ortalyǵynda órbıdi. Bul keshte jýrnalıster án salyp, Kámshat Joldybaeva polıtsııa qyzmetkerine aınalady. Sondaı-aq kontsert barysynda qazaq estradasynyń eń jarqyn juldyzdary Mádına Sadýaqasova, Erke Esmahan, Ámre, Roza Rymbaeva, Abaı Begeı, Nurjamal Úsenbaeva jáne t.b. óner kórsetedi.
«Qosh keldiń, Jańa jyl!», «Jańa jyl keshteri», «Jańa jyldyq astanalyq qaırymdylyq kesh» syndy kóptegen jobalar da mereke kúnderi kórermen nazaryna usynylady.
Taǵy Jańa jyl qarsańynda keńestik fılmder, eń úzdik kınolar men balalarǵa arnalǵan mýltfılmder de bolady.
Foto: Qazaqconcert
