«Habar» arnasy Meırambek Bespaev túsken telehıkaıany kórsetedi
ASTANA. QazAqparat - «Habar» telearnasy kórermenderine ene men kelin arasyndaǵy qarym-qatynasty sýretteıtin jańa kartına usynady. Qańtar aıynan bastap kórsetiletin komedııa «Kelinjan» dep atalady, dep habarlaıdy QazAqparat.
Kartınanyń oqıǵa jelisi boıynsha Kúlimhan apanyń úsh ul, bir qyzy bar. Uldardyń kenjesi úıge kelin alyp keledi. Qalada ósken Asylym esimdi arý aýyl ómirine úırenip, enesine unaǵysy keledi. Alaıda Kúlimhan apaıdyń minezi aýyr, muny aýyldaǵy ár adam biledi. Sondyqtan bolar oǵan eshkim jaqpaıdy, kelinderiniń biri de qatal eneniń kóńilinen shyqpaıdy. Sondaı kúnderdiń birinde Kúlimhan apanyń óz qyzy turmysqa shyǵady. Qyzy ózge úıdiń tútinin tútetip, kelin atanǵan kezde qatal eneniń kózqarasy ózgere bastaıdy.
«Biz kelinniń obrazy arqyly eneniń mártebesin kórsetý nemese eneniń kelinge qatty bolýy arqyly kelinniń ez bolyp júrgenin kórsetýdi maqsat etpedik. Bul jerde árqaısysynyń óz róli, sebebi bar. Eneniń sondaı bolýyna ne áser etti, nege bizdiń enelerimiz qatal, nege bizdiń kelinderimiz sondaı degen suraqtarǵa jaýap beremiz. Kelispeıtinderde bolýy múmkin, biraq ár adam ózin kóredi. Men oǵan senimdimin, óıkeni men kúndelikti kórip júrgen dúnıelerdi jazdym», - deıdi kartınanyń prodıýseri Gúlnur Mamasarıpova.
Teleserıalda belgili akterlermen qatar jas, akterlik joldy endi ǵana bastaǵandar bar. Kúlimhan apanyń rólin - Leılo Beknazar Hanınga oınaıdy. Prodıýserdiń aıtýynsha dál osy keıipkerdi uzaq izdegen, alaıdy ózi tanıtyn, buǵan deıin jumys istegen aktrısany tańdapty. Esterińizde bolsa, Leılo Beknazar Hanınga buǵan deıin «Habar» telearnasynda kórsetilgen «Ana júregi» teleserıalynda basty róldi somdaǵan edi.
«Kúlimhan - meniń keıipkerim, árbir aýylda bolatyn ana, ene. Qazaqtyń ózindik dástúrleri bar, bul ana men bala arasyndaǵy, úlkendi syılaý, kishini qurmetteý, ene men kelin arasyndaǵy qazaqy dástúrler, sonyń barlyǵy osy jerde kórinedi. Qazaqta kelin alsa ony úı qyzmetshisi etip salyp qoıady dep aıtyp jatady, biraq biz (eneler) muny ol jaman bolsyn dep aıtpaımyz ǵoı. Ene eshqashan óz balasy alyp kelgen kelin jaman bolsyn dep oılamaıdy, ony óz qyzyndaı baýyryna basady, biraq ár januıanyń óz dástúri bar, soǵan aqyryndap úıretý kerek. Sol otbasyǵa tartý kerek, sol jaǵynan qyzyqty bolady dep oılaımyn», - deıdi Leılo Beknazar Hanınga óz obrazy jaıly.
Sonymen qatar kartınadan Rústem Janamanov, Nazar Sultanbaev, Darıǵa Badyqova, Nurgúl Myńbaeva, Dáýlet Óserbaev, Sara Amangeldi syndy akterlerdi de kóresizder.
«Bizde úsh abysyn bar. Abysynnyń úlkenin Darıǵa Badyqova oınaıdy. Darıǵanyń óz ampýlasy bar, kórermenge jaqsy tanys aktrısa. Ortanshy abysyn Nurgúl Myńbaeva. Onyń buǵan deıingi jumystaryn qarap shyqtyq. Al kishkentaı kelin, qalada ósken qyzdy Sara Amangeldi oınaıdy. Shańyraqtaǵy úsh uldyń úlkenin Rústem Janamanov, ortanshy uldy Nazar Sultanbaev oınaıdy. Nazar buǵan deıin Qarasaı batyrdy oınady. Eki serıal eki túrli, bul bir qyzyq bolaıyn dep tur. Kishkentaı uldy, debıýtant, erejesiz jekpe-jekten álem chempıony Dáýlet Óserbaev somdaıdy», - deıdi Gúlnur Mamasarıpova.
Taǵy serıaldyń bir epızodynda Meırambek Bespaevty aýyl mýzykanty retinde oınaıdy. Jalpy fılm qarapaıym qazaqstandyqtardyń kez kelgenine tanys, qyzyqty, jyly bolady deıdi shyǵarmashylyq top. Al, ene men kelinder arasyndaǵy oqıǵalardyń qalaı aıaqtalaryn qańtar aıynda «Habar» telearnasynan tamashalańyzdar.
