«Habar» arnasy «Eurovision 2017» baıqaýyn tikeleı efırde kórsetedi
ASTANA. QazAqparat - «Habar» arnasy «Eurovision 2017» baıqaýynyń jartylaı fınaly men aqtyq synyn tikeleı efırden kórsetedi, dep habarlaıdy QazAqparat.
«Bizdiń telekórermender «Eurovision 2017» jartylaı fınalyn «Habar» arnasynyń tikeleı efırinen 9-11 mamyr kúnderi, al aqtyq syndy 13 mamyrda kóre alady!»,- delingen telearna taratqan aqparatta.
62-shi Eurovision án baıqaýy Kıevte osy jyldyń mamyr aıynda ótedi. Este bolsa Shvetsııa astanasynda ótken «Eurovision 2016» saıysynda «1944» ánimen ýkraınalyq Djamala jeńiske jetip, Ýkraına 2017 jylǵy baıqaýdy ótkizý quqyǵyna ıe bolǵan edi.
«Eurovision 2017» án dodasyna 42 memleket qatysady. Básekelestikke Portýgalııa men Rýmynııa qaıta oraldy, al Bosnııa jáne Gertsegovına elderi qatysýdan bas tartty. Avstralııa Uıymdastyrý komıtetiniń arnaıy ruqsatymen konkýrsqa qatysýdy jalǵastyrýda. Halyqaralyq sharany baıqaý tarıhynda tuńǵysh ret erler trıosy júrgizedi. Olar Aleksandr Skıchko, Vladımır Ostapchýk, Tımýr Mıroshnıchenko.
Aıta keteıik, Eurovision baıqaýyn Ýkraına osymen ekinshi ret ótkizgeli jatyr. Alǵash ret 2005 jyly ótkizý mártebesine ıe bolǵan.
