«Habar» arnasy «Alastatylǵandar» teleserıalyn kórsetý quqyǵyna ıe boldy
ASTANA. QazAqparat - «Habar» telearnasy «Alastatylǵandar» («Les Misérables») brıtandyq teleserıalyn kórsetý quqyn satyp aldy.
«Alastatylǵandar» serıalynyń «Habar» arnasyndaǵy tusaýkeseri brıtanııalyq telearnamen qatar bolady. Kartına ár dúısenbi saıyn saǵat 21.30-da kórsetiledi.
Alty bólimdi drama - Vıktor Gıýgonyńtanymal romanynyń jelisi boıynsha túsirilgen jáne «BBC One» telearnasynda kórsetiledi.
Teleserıalda XIX ǵasyrdyń basyndaǵy oqıǵalar sýretteledi. Jan Valjan - nan urlap sottalǵan qashqyn. Ol uzaq jyldardan beri polıtsııa ınspektory Javerden tyǵylyp júredi. Javer bolsa zańnyń ádildigine senedi, sondyqtan qashqyndy tutqyndaý ómiriniń basty isi dep esepteıdi. Sonymen qatar Jan Valjan úshin mańyzdy adamdardyń biri - Fantına esimdi áıeldiń qaıǵyly taǵdyry da baıandalady. Onyń nekesiz týǵan Kozetta esimdi qyzy bar. Fantına kóz jumǵan soń Jan Valjan Kozettany óz balasyndaı tárbıeleıdi. Oqıǵa 1832 jyly Parıj qalasynda ótken Maýsymdaǵy kóterilispen damı túsedi. 
Kartına rejısseri - Tom Shenklend. Stsenarııin L.N.Tolstoıdyń romany jelisimen túsirilgen «Soǵys jáne beıbitshilik» serıalynyń stsenarııin jazǵan Endrıý Devıs jazdy.
Jan Valjannyń rólin Domınık Ýest, ınspektor Javerdiń rólin Devıd Oıeloýo, Fantınany Lılı Kollınz somdaıdy.
Domınık Ýest - eki ret «Altyn globýs» syılyǵyna usynylǵan, ol kórermenge «300 spartanshy», «Gannıbal: Órleý», sondaı-aq «Tyń tyńdaý» serıaldary arqyly tanys.
Devıd Oıeloýo - Brıtanııa ımperııasy ordeniniń ofıtseri. «Selma» fılmindegi Martın Lıýterdiń róli úshin «Altyn globýs» syılyǵyna usynylǵan. «Maımyldar planetasynyń kóterilisi», «Qyzmetshi áıel», «Birikken koroldik» jáne basqa kartınalarda oınady.
Lılı Kollınz - «Erejesiz» fılmindegi róli úshin «Altyn globýs» syılyǵyna usynylǵan. «Okcha», «Aqshaqan qyz: Gnomdardyń kegi», «Mahabbatpen, Rozı» jáne basqa fılmder arqyly tanys.
Sondaı-aq serıalda Adıl Ahtar (Tenarde myrza), Olıvııa Kolman (Tenarde hanym), Ellı Bamber (Kozetta), Djosh O'Konnor (Marıýs) jáne Erın Kellıman (Eponına) oınaıdy.
«Alastatylǵandar» romanynyń negizinde birneshe ret kınolar túsirilip, spektalder qoıyldy. 2012 jyly túsirilgen fılmnen aıyrmashylyǵy serıalda áýender bolmaıdy.
