«Habar» arnasy 6 qańtardan bastap «Traktorshynyń mahabbaty» telehıkaıasyn qaıtalap kórsetedi
ASTANA. 6 qańtar. QazAqparat - «El arnada» tusaýy kesilip, kórermen tarapynan joǵary baǵasyn alyp úlgergen «Traktorshynyń mahabbaty» serıaly búginnen bastap «Habar» arnasynan kórsetiletin bolady.
Esterińizge sala keteıik, «Habar» agenttigi, «El arna» arnasy men belgili prodıýser Baıan Esentaevanyń jobasy televızııalyq reıtıngterge sáıkes, otandyq serıaldar arasynda eń joǵary kórsetkishterge ıe bolǵan edi.
Sıýjetke sáıkes, Bella esimdi sulý boıjetken óziniń toıyna asyǵyp bara jatyp, Astana-Almaty trassasynda kólik apatyna ushyraıdy. Ony jolaı ótip bara jatqan traktorshy - Jasulan qutqaryp alady. Aýylda esin jıǵan Bella aıaq astynan jadynan aıyrylyp, ótken ómirin eske túsire almaıdy. Osy sátten bastap qalalyq qyzdyń aýyldaǵy ómiri, traktorshynyń anasy men basqa da aýyl turǵyndarymen qyzǵylyqty qarym-qatynasy bastalady.
Basty rólde - KeshYOU tobynyń ánshisi Kámshat Joldybaeva. «Ǵashyq bolǵysh» traktorıst - «Lıkvıdator», «A»-ǵa oralý», «Mahambet», t.b. fılmderden kórermenge jaqsy tanys Berik Aıtjanov. Ákim rólin áıgili akter Dımash Ahımov somdasa, onyń áıeli - «Tamashanyń» juldyzy Gúljan Qalybaeva. Sondaı-aq serıaldyń kórki bolyp júrgen B.Rımova atyndaǵy teatrdyń ártisi Álıhan Ydyrysovanyń oıynyn atap aıtýǵa bolady.
16 serııaly serıaldyń oqıǵa jelisin oılap taýyp, stsenarııin jazǵandar - Danııar Kúmisbaev pen Asqar Uzabaev. Qysqasy, «Traktorshynyń mahabbatynan» qashan da kórermen kóńilindegini dóp basatyn Baıan Esentaeva bastaǵan toptyń qoltańbasy ańǵarylady.
«Serıaldyń kórermender kóńilinen shyqqanyna qýanyshtymyz, - deıdi Baıan Esentaeva. - Eń qyzyǵy, túsirilim kezinde bárimiz shyn máninde aýylda turdyq - sý tasyp, samaýyrdan shaı ishtik, aýyldyń turmys-tirshiligine aralasyp, naǵyz aýyl adamdaryna aınaldyq. Kámshat sıyr saýyp úırendi. «Qutty qonaq kelse, qoı egiz týady» demekshi, jaqsy nyshan - týra túsirilim kezinde sıyr buzaýlady. Aýyldaǵy turmys ońaı emes shyǵar, biraq mahabbat qaı kezde de bolatyny anyq. Serıaldy jiberip almańyzdar, budan ári odan da qyzyq bolady!»
«Traktorshynyń mahabbaty» serıaly «Habar» telearnasynan 6 qańtardan bastap, dúısenbi-juma aralyǵynda 21.30-da (qaıtalaýy 11.50-de) kórsetiledi.
