«Habar» agenttigine – 25 jyl

NUR-SULTAN. QazAqparat - Búgin memlekettik aqparat saıasatynyń senimdi habar taratýshy quqyǵyn ıelengen «Habar» agenttigine 25 jyl toldy, dep habarlaıdy QazAqparat tilshisi.

«Habar» ulttyq televızııalyq aqparattyq agenttiginiń brendimen alǵashqy jańalyqtar toptamasy 1994 jyly efırge shyqty. Alǵashqy kúnnen bastap-aq «Habar» UTAA jańalyqtary teńdessiz tanymaldyqqa ıe. Agenttik ujymy aldyna maqsat qoıa biletin ári jalyndy jastardan quralǵan televızııadaǵy eń jas komanda boldy.

1995 jyly 23 qazanda Úkimet qaýlysymen «Habar» Agenttigi respýblıkalyq memlekettik mekemesi quryldy. «Habar» Agenttigi» RMK-niń bas dırektory bolyp Darıǵa Nursultanqyzy Nazarbaeva saılandy. Telekompanııa qurylǵannan bastap, aldymen aımaqtyq, sodan keıin sheteldik aqparattyq jeli qurý jumysy alda turdy. 1996 jyldyń aıaǵyna qaraı Aqmola, Qaraǵandy, Semeı qalalarynda tilshiler qosyny ashyldy. Búgingi tańda 14 óńirde tilshiler qosyny jumys isteýde.

1996 jyly qazaqstandyq televızııa tarıhynyń damýynda alǵash ret «Habar» agenttigi telehıkaıa túsirýdi bastap, 90-jyldardaǵy kórermen úshin tanymal janrdy qolǵa aldy. «Toǵysqan taǵdyrlar» telehıkaıasynyń 465 serııasyn túsirip, efırge shyǵardy. Atalǵan telehıkaıanyń akterleri erekshe tanymaldyqqa ıe boldy.

Alǵashqy sport jańalyqtary «Habarda» jeke aıdar retinde efırge 1997 jyly shyqty. 2002 jyly «Habar» agenttigi Pýsanda ótken Azııa oıyndaryna sport jýrnalısterin akkredıtatsııadan ótkizdi. Sol ýaqyttan beri 4 jyl saıyn uıymdastyrylatyn kontınentaldy jarystarda «Habar» agenttiginiń sport jýrnalısteriniń ujymy jumys isteıdi. Uzaq ýaqyt boıy Olımpıada oıyndaryna Qazaqstannyń atynan baratyn jalǵyz telearna boldy: Beıjińde (2008 j.), Vankýverde (2010 j.), Londonda (2012 j) agenttik tilshileri sport jańalyqtaryn jetkizdi. Tek Sochıde (2012 j.) basqa qazaqstandyq telearnalardyń sport kommentatorlary qosyldy.

Telearnanyń aqparattyq qyzmeti ınnovatsııalardy, onyń ishinde onlaın-qosylym, breaking news, telekópirlerdi belsendi qoldana bastady: Kásibı televızııalyq tehnıkanyń kóp bóligi qazaqstandyq telejýrnalıstıka tarıhynda alǵash ret qoldanyldy. 1998 jyly «Habar» live rejımi boıynsha «Mır» ǵarysh stansasynan tikeleı efırge shyqty. Talǵat Musabaevtyń oryndaýyndaǵy «Kózimniń qarasy» áni «Habardyń» kórermeni úshin ǵaryshtan tikeleı efırde estildi.

«Habar» óziniń shırek ǵasyrlyq ǵumyrynda jýrnalıstıkanyń «naqty, jedel ári shynaıy» deıtin úsh qaǵıdasynan aýytqyǵan emes. Ásirese eldiń saıası ómirinen aqparat taratýda telekompanııaǵa júktelgen jaýapkershilik zor. 2005 jyldyń kókteminde telearnanyń jańalyqtar qyzmetinde mańyzdy ózgeris boldy. Alǵash ret resmı túrde prezıdenttik pýl quryldy. ıAǵnı tek Prezıdenttiń qyzmetin jarııalaıtyn jýrnalıster toby jasaqtaldy. Al sol ýaqytqa deıin Prezıdent pýly degen uǵym qazaq televızııasynda bolǵan emes. Memleket basshysynyń qyzmetin jarııalaýǵa jýrnalısterdiń bári birdeı jumylatyn. Olardyń ishinde Maıra Qabıeva, Tileýqabyl Myńjasarov, Maqat Sadyq sekildi «Habardyń» ardagerleri de bar. Biraq resmı qurylǵan prezıdenttik pýldyń alǵashqy qazaqtildi jýrnalısi – Beısen Quranbek bolatyn.

Búgingi «Habar» agenttigi – qazaq, orys, aǵylshyn tilderinde habar taratatyn tórt telearnanyń basyn qosqan teleotaý. Olar: «Habar» telearnasy, «Kazakh TV» ulttyq spýtnıktik telearnasy, táýlik boıy jumys isteıtin «Habar 24» aqparattyq telearnasy men «EL ARNA» kınokanaly.