«Habar» agenttigi merekege oraı barsha analarǵa erekshe syı ázirledi

NUR-SULTAN. QazAqparat - «Habar» agenttigi qalyptasqan dástúr boıynsha barsha analarǵa erekshe syı ázirledi. Bul týraly óziniń Facebook paraqshasynda «Habar» agenttigi basqarma tóraǵasynyń orynbasary Rınat Kertaev jazdy, dep habarlaıdy QazAqparat.

«Bıyl da halyq arasynda keń tanylǵan ádemi ánge merekelik beınebaıan túsirdik. Bul jolǵy tańdaý Tumanbaı Moldaǵalıevtiń sózine jazylǵan Rústem Qorazbaevtyń «Jan ana» ánine tústi. Ándi kezinde Meırambek Bespaev pen Toqtar Serikovtiń oryndaǵany áli kópshiliktiń esinde. Biraq sońǵy jyldary bul án kóp estilmeıtin bolyp júr.

Halyq júreginen oryn alǵan án birinshi ret óńdelip, tyńdarmanǵa jańa nusqada usynylyp otyr. Ony Meırambek Bespaev, Baǵlan Ábdiraıymov, Ǵadilbek Jańaı, Nurbolat Abdýllın, Ábdijappar Álqoja, Ernar Aıdar, Ǵazızhan Shekerbek pen «Mýzart Life» toby sııaqty saıdyń tasyndaı iriktelgen talantty jigitter oryndaıdy.

Beıneklıp arý Almatyda túsirildi. Oǵan kásibı akterler emes, qarapaıym qala turǵyndary tartyldy. Sıýjet jelisi boıynsha temirjolshy, polıtseı, muǵalim, dáriger, kólik júrgizýshi bolyp eńbek etip júrgen analardy óz balalary quttyqtaıdy. Osylaısha, asyl analarymyzǵa qurmet kórsetiledi»,-dep jazdy.

Klıptiń prodıýseri - Nurserik Qambar, rejısseri - Oljas Ibraev, operatory - Álibek Álıev.

«Jańa ǵana beınebaıannyń tusaýy kesildi. Aldaǵy mereke kúnderi «Habar» agenttigine qarasty telearnalardyń efırinen tamashalaı alasyzdar.

Meıirim men jylýlyqqa toly beınebaıan kóptiń kóńilinen shyǵady degen úmittimiz. Endeshe, qabyl alyńyzdar!»,-delingen Rınat Kertaevtyń jazbasynda.