«Habar» Agenttigi» AQ jańa telemaýsymyn ashty
ALMATY. Qyrkúıektiń 7-si. QazAqparat /Erbol Turymbetov/ - «Habar» jáne «El arna» telearnalarynyń 15 jyldyq mereıtoıyna oraı «Habar» Agenttigi» AQ jańa telemaýsymyn ashty. Onyń alǵashqysy bolyp «Janym» atty jańa teletoptama kórermenderge jol tartady, dep habarlaıdy QazAqparat.
Jańa teleserıal zamanaýı qalalyq qazaqy otbasyndaǵy jaǵdaılarǵa qurylǵan melodrama. Stsenarıı avtorlary Láılá Aqynjanova, Aleksandr Kan, Mıhaıl Belıakov. Qoıýshy-rejısserleri Baqtııar Seıitqazıev pen Aıbek Daıyrbekov. Fılm «Astana telefılm» kompanııasynyń ónimi bolyp tabylady.
«Bul maýsymda biz kınokórsetilimderge kóp kóńil bóletin bolamyz. Efırde ekshn da, álemdik klassıka da bolady. Biraq biz bastama retinde osy «Janym» teletoptamasyn aldyq. Sonymen birge, «El arna» telearnasynda «Ashyq poshta», «Shirkin, Life» baǵdarlamalaryn shyǵardyq. Keler aptada «Bári esimde» telejobasy kórermenmen qaýyshady», dedi «Habar» Agenttigi kreatıvti dırektory Erjan Súleımenov.
Kınosynshylar «kúzdiń basty oqıǵasy» dep baǵa bergen bul telehıkaıa otbasymen otyryp kóretin shym-shytyryq oqıǵalar jelisi. Onda Ábenovter januıasy qıyn kezeńderdi bastan keshiredi. Qupııaly, tereń suraqtarǵa jaýap izdeıdi.
«Bul telehıkaıada úsh urpaq ókilderiniń toǵysýy kórsetilgen. Ár túrli jaǵdaılarǵa tap bolatyn otbasy ómirin kórsetýmen birge ómirdiń barlyq suraqtaryn qamtýǵa tyrystyq», deıdi L. Aqynjanova.
Qatysýshylardyń aıtýynsha, jańa joba qyrkúıektiń 13-inde ekranǵa shyǵady dep josparlanǵan.
