«Habar» Agenttigi AQ basqarma tóraıymynyń jańa orynbasary taǵaıyndaldy
ASTANA. QazAqparat - «Habar» Agenttigi Qanat Aqylbaıuly Saharııanovtyń 2016 jyldyń 12 jeltoqsanynan bastap basqarma tóraıymynyń orynbasary jáne Tileýjan Temiráliuly Tileshovtiń 2016 jyldyń 9 jeltoqsanynan bastap basqarýshy dırektor qyzmetine taǵaıyndalǵanyn habarlaıdy. Qanat Saharııanov basqarma tóraıymynyń orynbasary Aıgúl Jumabaevanyń ornyn almastyrdy.
Saharııanov Qanat Aqylbaıuly 1975 jyldyń 13 qazan kúni Almaty qalasynda dúnıege kelgen. 1997 jyly Qazaq memlekettik medıtsınalyq ýnıversıtetiniń dáriger-stomatolog mamandyǵyn aıaqtaıdy, 2001 jyly Qazaq ulttyq zań akademııasynyń quqyqtaný fakýltetin bitirip, 2008 jyly Joǵary Frantsýz kommertsııa mektebinde MVA dárejesin alady. 2001-2006 jyldary «Habar» Agenttiginde zańger, 2006 jyldan 2012 jylǵa deıin «Habar» Agenttigi tóraǵasynyń birinshi orynbasary laýazymynda boldy. 2012 - 2014 jyldar aralyǵynda «Qazmedıa Ortalyǵy» basqarýshy kompanııasynyń Bas dırektory qyzmetin atqardy. Osy ýaqytqa deıin Kommertsııalyq Televızııalyq arnanyń (KTK) Bas dırektory qyzmetin atqardy. Qazaq, orys, aǵylshyn jáne japon tilderin jetik meńgergen. «Qazaqstan Respýblıkasynyń táýelsizdigine 20 jyl» medalimen marapattalǵan.
Al Tileshov Tileýjan Temiráliuly 1981 jyldyń 26 tamyzynda Jambyl oblysynda dúnıege kelgen. 2002 jyly Qazaq memlekettik basqarý akademııasyn qarjy jáne kredıt mamandyǵy boıynsha, sondaı-aq 2008 jyly Qazaq memlekettik agrarlyq ýnıversıtetin zań fakýltetin támamdaǵan. 2016 jyldan «Qazteleradıo» AQ Dırektorlar keńesiniń múshesi. Sonymen birge «Prime Financial Solutions» AQ, «ONPF «Otan» AQ, «Aqtóbe TETs» AQ, «Samuryq Energo» AQ kompanııalarynyń Dırektorlar keńesiniń músheliginde boldy. «Qazaqstan halqy Assambleıasyna 20 jyl», «Qazaqstan Respýblıkasynyń konstıtýtsııasyna 20 jyl», «Qazaqstan Respýblıkasynyń táýelsizdigine 20 jyl», «Qazaqstan Respýblıkasy UQQ shekara qyzmeti Avıatsııalyq bazasyna 80 jyl» medaldarymen jáne Halyqaralyq Ekologııa Palatasynyń Qurmetti professory dıplomymen marapattalǵan.
