H.Karzaı Obamamen kezdesýden bas tartty
ASTANA. QazAqparat - Aýǵanstan prezıdenti Hamıd Karzaı eline kelgen óziniń amerıkalyq áriptesi Barak Obamamen kezdesýden bas tartty, dep habarlady AFP.
Kezdesý Bagram áýe bazasynda ótýi tıis edi, alaıda Karzaı Obamanyń shaqyrýyn kemsitý retinde qabyldap, "Aýǵanstan úkimeti AQSh lıderin Kabýldaǵy prezıdent saraıynda qarsy alýǵa daıyn" ekenin, alaıda Obamamen kezdesýge Bagramǵa barmaıtynyn málimdedi. Agenttik atap ótkendeı, bul oqıǵa eki prezıdent arasyndaǵy qarym-qatynasty shıelenistire tústi.
Obama Karzaımen telefon arqyly baılanysyp, ekeýi 15-20 mınýt sóılesti. AQSh prezıdenti óz áriptesine jaqyn arada 2014 jyldan keıin elde qalatyn áskerılerdiń naqty sanyn aıtatynyna sóz berdi. Biraq áskerı operatsııa aıaqtalǵan soń amerıkalyq áskerılerdiń statýsyn anyqtaıtyn qaýipsizdik týraly kelisimge Obama jańa prezıdent saılanǵan soń qol qoıady. Eki tarap kelisimge kelmegendikten jańa prezıdenttiń esimi kelesi aıda ,saılaýdyń ekinshi kezeńinde belgili bolmaq.
