H.Karzaı men onyń komandasy budan bylaı Aýǵanstan saıasatynda kóshbasshy bolmaıdy - Mahmud Saıkal
ASTANA. QazAqparat - Aýǵanstan Islam respýblıkasynyń eks-prezıdenti Hamıd Karzaı eldiń saıası ómirinde budan bylaı kóshbasshy bola almaıdy. Bul týraly búgin Frıdrıh Ebert atyndaǵy qordyń uıymdastyrýymen ótken "Aımaqtyq beıbitshilik pen turaqtylyq týraly birlesken deklaratsııanyń" tusaýkeser rásiminde "Afghanistan Polisy Group" ortalyǵynyń saıası jetekshisi Mahmud Saıkal aıtty.
"Bizde jýyrda prezıdenttik saılaý ótti. Nátıjeleri birneshe kúnde belgili bolady. Bizde eki stsenarıı bar. Birinshisi - birinshi týrda-aq jeńimpaz belgili bolýy múmkin. Al ekinshisi - eger olaı bolmasa, saılaýdyń ekinshi týryn ótkizemiz. Degenmen qazirdiń ózinde belgilisi, Karzaı myrza men onyń komandasy budan bylaı aýǵan saıasatynda negizgi oıynshy bola almaıdy. Jańa bılik qalyptasyp, ol quqyqty alǵa shyǵaryp, jemqorlyqty tyıady", - dedi M.Saıkal.
Onyń aıtýynsha, Aýǵanstan úshin prezıdenttik saılaý tarıhı oqıǵa boldy.
"Talıbannyń qorqytyp-úrkitýine qaramastan, saılaýshylarymyzdyń 60%, shamamen 7 mln. adam daýys berdi. Olardyń saılaý ýchaskelerine kelýiniń ózi bizdiń qarýly qarsylastarymyzǵa elimizdiń demokratııalyq jolmen damyǵysy keletinin kórsetti", - dedi ol.
Aıta keteıik, atalǵan qujatty Aýǵanstan, Ortalyq Azııa, Úndistan men Pákistannyń 60-tan astam sarapshysy jazǵan. Onda kórshiles memleketterdiń Aýǵanstandy ońaltýǵa jáne transformatsııalaýǵa qalaı úles qosa alatyny jóninde aqyl-keńester men málimdemeler bar. Bul óz kezeginde aımaqty tutastaı damytýǵa múmkindik beredi.
Sharaǵa qatysýshylardyń atap ótýinshe, kórshiles ornalasqan Ortalyq Azııa aımaǵy Aýǵanstandaǵy ahýaldy turaqtandyrýda mańyzdy ról atqaryp, eldiń áleýmettik-ekonomıkalyq damýyna súbeli úles qosa alady. Qazaqstan Respýblıkasy Ortalyq Azııadaǵy serpindi damyp kele jatqan memleket retinde ózara kómek pen bitimgershiliktiń aımaqtyq tetikterin qalyptastyrýǵa belsendi túrde atsalysýǵa daıyndyǵyn bildirdi.
Frıdrıh Ebert atyndaǵy qordyń Aımaqtyq jobasy Aýǵanstan, Ortalyq Azııa (Qazaqstan, Qyrǵyzstan, Ózbekstan, Tájikstan), Úndistan men Pákistan sarapshylary úshin biregeı dıalog alańyn qalyptastyryp berdi. Sarapshylar joba sheńberinde bir jarym jyl boıy aımaqtyq problemalardy sheshý joldaryn izdestirip, tarıhı jáne saıası qaqtyǵystar jóninde dıalog qurý baǵytynda jumys istedi. "Aımaqtyq beıbitshilik pen turaqtylyq týraly birlesken deklaratsııa" osy jumystyń nátıjesi.
Buǵan deıin mundaı tusaýkeser rásimderi Kabýl, Ystambul, Islamabad, Peshavar, Vashıngton, Nıý-Iork, Berlın jáne Brıýssel qalalarynda ótken. Atalǵan sharalar barysynda osy elderdiń memlekettik organdary men BUU, EO syndy halyqaralyq uıymdar ókilderine Deklaratsııa tabystalǵan.
