H. Karzaı: AQSh-tyń Aýǵanstanǵa paıdasynan góri zııany tıdi
ASTANA. QazAqparat - Aýǵanstan prezıdenti Hamıd Karzaı AQSh áskerıleriniń Aýǵanstanǵa paıdasynan góri zııanyn tıgizgenin málimdedi, dep habarlaıdy RBK.
«Osy 12 jyl boıy biz Amerıkadan azamattyq turǵyndarǵa adam dep qaraýyn ótinýmen keldik», - dedi ol brıtanııalyq Sunday Times basylymyna bergen suhbatynda amerıkandyq áskerdiń áreketiniń nátıjesinde kóptegen beıbit turǵyndardyń japa shekkenin alǵa tartyp. H.Karzaı sońǵy 7 aıda AQSh prezıdenti Barak Obamamen tipti sóılespegenin de atap ótti. «Biz sońǵy ret Ońtústik Afrıkada Nelson Mandelanyń jerleýinde kezdestik, biraq til qatyspadyq. Tek hat almasyp turdyq», - dedi Aýǵanstan prezıdenti. Sondaı-aq, AQSh jetekshilik etetin NATO qaýipsizdikti qamtamasyz etý mıssııasyn sátsiz oryndady. Onyń ishinde, Gılmend aımaǵyndaǵy jumysyn erekshe atap ótýge bolady dedi ol. Brıtanııalyq gazettiń: «Brıtanııalyq áskerdiń sol jerge barmaǵanynda jaǵdaı jaqsyraq bolar ma edi?» degen suraǵyna H.Karzaı «Meniń oıymsha solaı bolar edi. Iá, anyq solaı bolar edi» dep jaýap berdi. Sunday Times atap ótkendeı, Aýǵanstan prezıdenti bul sózderimen jáne suhbatta talıbterdi «baýyrlar» deýimen aǵylshyn qaýymynyń narazylyǵyn týdyrdy. Jalpy alǵanda Aýǵanstanda 447 brıtanııalyq áskerı qaza taýyp, 2 myńnan astamy jaraqat aldy. H.Karzaı 2014 jyly sáýirde ótetin prezıdent saılaýynan keıin otstavkaǵa ketedi.
