H.Bekhojınniń 100 jyldyq mereıtoıyna arnalǵan kitaptyń tanystyrylymy ótti
ATY. 25 aqpan. QazAqparat /Ádilet Musahaev/ - Keshe Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde Qazaqstan ulttyq jýrnalıstıkasy ǵylymy men bilimi salasyndaǵy belgili ǵalym
Haıyrjan Bekhojınniń 100 jyldyq mereıtoıyna arnalǵan «Ónegeli ómir» serııasymen jaryq kórgen kitaptyń tusaýkeseri ótti.
Atalǵan ıgi sharany ýnıversıtet rektory Ǵalymqaıyr Mutanov ashyp, qarashańyraq QazUÝ-de úlken bastama qolǵa alynyp jatqandyǵyn aıtyp ótti. «Ulttyq ýnıversıtette qyzmet atqarǵan azamattar bir tóbe. Biz sol zııalylarymyzdyń eńbekterin nasıhattasaq, búgingi jastarǵa úlgi-ónege bolady», - dedi rektor. Sonymen qatar ol pýblıtsıstiń ustazdyq tárbıesin, jaqsylyǵyn kórgen qaýymǵa bul otyrys alda bolashaq mamandardy daıarlaýda tyń serpilisterge baǵyt bersin degen tilegin jetkizdi.
Kósemsózshiniń kóregendigin saralaı kelgen ardager-ustazdar Tursynbek Kákishev, Ábilfaıyz Ydyrysov jáne búginde qazaq baspasóziniń órisin damytyp otyrǵan Jumabek Kenjalın, Jumabaı Shashtaıuly, Ulyqbek Esdáýlet, Bekjan Áshirbaev, Samat Ibraıym sııaqty jýrnalıst ókilderi kezek-kezegimen sóz alyp H.Bekhojınniń adamdyq bolmysyn asha tústi. Professor, f.ǵ.d, akademık T. Kákishev H. Bekhojınniń amamgershiligi ómir boıy azyq bolyp kele jatqandyǵyn aıtyp ótip, táýelsizdigimizdiń bir anyq belgisi retinde daralarymyzdy, danalarymyzdy nasıhattaı berýge shaqyrdy.
Al Jumabek Kenjalın óz kezeginde ustazyna degen tolǵanysyn bildirdi. «Bizge uly ustazdar dáris oqydy. Biz Haıyrjan aǵamyzdan dáris tyńdap, synaq tapsyryp, tálim aldyq. Ol kisi keńestik ıdeologııanyń qylburaýy kezeńiniń ózinde «Aıqap», «Qazaq» gazetteri týraly aıtatyn», - deıdi ol.
Sondaı-aq jýrnalıstıka tarıhy kafedrasynyń meńgerýshisi Saǵymbaı Qozybaevtyń aıtýynsha, 4 naýryzda Haıyrjan Bekqojınniń mereıtoıyna oraı halyqaralyq ǵylymı-tájirıbelik konferentsııa ótpek.
