ǴZI materıaldyq-tehnıkalyq bazasyn 2015 jylǵa deıin tolyq jańartamyz - Ǵylym komıtetiniń tóraǵasy
ALMATY. 27 qazan. QazAqparat /Erlik Erjanuly/ - QR Bilim jáne ǵylym mınıstrligi 2015 jylǵa deıin ǵylymı-zertteý ınstıtýttarynyń (ǴZI) materıaldyq-tehnıkalyq bazasyn jańartyp, kadrlyq saıasatyn qaıta qaramaq.
Bul búgin Almatyda Halyqaralyq ınjenerlik akademııa prezıdentter keńesiniń Qazaqstannyń ǵylymı ınjenerlik qoǵamdastyǵy ókilderimen kezdesýi kezinde aıtyldy.
"Biz Qazaqstandaǵy ǵylymnyń qazirgi jaı-kúıine monıtorıng júrgizdik. Ol meni qatty qaıran qaldyrdy. Ǵylymı-zertteý ınstıtýttarynyń barlyq qural-jabdyqtary moraldyq jaǵynan da, fızıkalyq turǵydan da ábden tozǵan. Al ondaǵy ǵalymdardyń 60 paıyzdan astamynyń orta jasy 55-pen 60-tyń aralǵynda. Bul jaǵdaı qazir tek Qazaqstanda emes, búkil álemdik ǵylym salasyndaǵy ortaq másele bolyp otyr", - deıdi QR Bilim jáne ǵylym mınstrliginiń Ǵylym komıtetiniń tóraǵasy Baqtybaı Qasymbekov. Onyń aıtýynsha, jastardy ǵylymǵa tartý úshin olarǵa keńestik dáýirdegideı áleýmettik jaǵdaı jasaý josparlanýda. Bul úshin 2015 jylǵa qaraı ǵylymdy qarjylandyrýǵa bólinetin qarjy jalpy ishki ónimniń 1 paıyzyna, ıaǵnı 300 mıllıard teńgege (2 mıllıard $) deıin ulǵaıtylmaq.
