Ǵylymnyń anaǵurlym ozyq salalary boıynsha tym artta qalyp kele jatyrmyz - Toqaev
Bul týraly búgin Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń birinshi otyrysynda sóılegen sózinde aıtty, dep habarlaıdy QazAqparat.
«Qazirgi ahýaldy sıpattaý úshin myna máselelerge toqtalyp ótý qajet. Sońǵy bes jylda ǵylymǵa bólinetin qarjy 60 paıyzǵa artty. Al ishki jalpy ónimdegi ǵylymnyń úlesi, kerisinshe, 0,13 paıyzǵa tómendedi. Bul qarajattyń basym bóligi, naqtyraq aıtsaq, 70 paıyzy bıýdjetten bólinedi»,-dedi Qasym-Jomart Toqaev.
Sondaı-aq ǵylymnyń túrli salasyn qarjylandyrý isinde óte úlken teńsizdik bar ekenin atap kórsetti. Qarajattyń 82 paıyzy irgeli jáne qoldanbaly ǵylymǵa jumsalady. Qalǵan 18 paıyzy ǵana tájirıbelik-konstrýktorlyq zertteýlerge arnalǵan.
Elimizde ǵylymı zertteýlerdi iske jaratyp, qoldanysqa engizetin óndiris óte az. Kásiporyndardyń 65 paıyzy shıkizat, metallýrgııa salasynda jumys isteıdi. Bul – úshinshi tehnologııalyq deńgeı degen sóz.
Mashına jasaý, munaı-hımııa salasyndaǵy, ıaǵnı tórtinshi deńgeıdegi óndiristiń úlesi – 34 paıyz. Qalǵan 1 paıyzy mıkroelektronıka, robottandyrý jáne IT salalarynda nemese besinshi deńgeıdegi tehnologııamen jumys isteıdi.
«Nano jáne bıotehnologııaǵa negizdelgen altynshy deńgeıdegi óndiris bizde múlde joq. Bul jaǵdaı kósh sońynda júrgenimizdi kórsetedi. Ǵylymnyń anaǵurlym ozyq salalary boıynsha tym artta qalyp kele jatyrmyz. Men naqty tsıfrlardy mysalǵa keltirdim. Ony moıyndaýymyz kerek.Damyǵan elderde kásiporyndardyń teń jartysynan kóbi – besinshi, al 5 paıyzy – altynshy deńgeıge jetken. Bir sózben aıtqanda, bizdiń óndiristerimiz olarmen salystyrǵanda artta qalǵan.Bul aıyrmashylyqty joıý – elimiz úshin óte ózekti másele. Sondyqtan ǵalymdarymyzǵa aıryqsha mindet júkteledi»,-dedi Memleket basshysy.
