Ǵylymı jobalardy irikteý konkýrstaryn úzdiksiz ótkizý kerek - forým
ASTANA. QazAqparat - Kommertsııalandyrýǵa negizdelgen ǵylymı jobalardy irikteýge konkýrstar úzdiksiz ótkizilýi tıis. Bul týraly búgin Astanada tehnologııany kommertsııalandyrý taqyrybyna arnalǵan halyqaralyq forýmda Senat depýtaty Baqytjan Jumaǵulov málim etti, dep habarlaıdy QazAqparat.
«Kommertsııalandyrýǵa bir mezettik jappaı konkýrstar ótkizýdi doǵarý kerek. Álemdik kórsetkishterge súıensek, ınnovatsııalyq protsess úshin osyndaı tájirıbemen júrý qolaısyz bolady. Sebebi konkýrstar úzdiksiz ótkizilýi tıis. Meniń oıymsha, ǵylym salasynda konkýrstar jyldyń kez kelgen ýaqytynda turaqty túrde ótkizilgeni durys bolady», - dep toqtaldy depýtat.
Osy oraıda B. Jumaǵulov kóptegen batys elderiniń qorlary atalǵan tájirıbeni iske asyryp otyrǵanyn atap ótti.
«Eger jobalar paıda bolsa, onda olar birden konkýrstar jarııalaýǵa tyrysady. Sáıkesinshe, irikteý sharalaryna qaraı, jobalar eshbir tejeýsiz iske qosylady. Sondyqtan osy jaıynda jumystardy naqty pysyqtaǵan jón bolar», - dedi depýtat.
Sóz sońynda Baqytjan Jumaǵulov JІÓ-ge shaqqanda ǵylymdy qarjylandyrý úlesin kóterý máselesin Úkimet pen Parlament deńgeıinde qaıta kóterý kerektigin atap ótti.
Budan buryn habarlanǵandaı, forým barysynda senator bıznes pen ǵylymǵa qatysty qandaı kúdigi bolǵanyn aıtqan edi.
Sonymen qatar, ol kommertsııalandyrýǵa ǵylymı jobalardy irikteý úshin bıznestiń qatysýymen jańa qurylym kerektigin sóz etti.
Aıta keteıik, jaqynda Senatta ótken «dóńgelek ústel» otyrysynda QR Bilim jáne ǵylym vıtse-mınıstri Ashat Aımaǵambetov Qazaqstanda otandyq ǵalymdardyń jobalaryna jeke sektordyń ınvestıtsııasy úsh esege artqanyn málimdegen bolatyn.
