Ǵylymı, sporttyq medıtsınanyń kómegimen eki dúrkin Olımpıada chempıony bolar edim - E. Ibraımov
ALMATY. QazAqparat- Eger bizdiń kezimizde Qazaqstanda ǵylymǵa negizdelgen, zamanaýı, sporttyq medıtsınalyq ortalyq bolǵanda, meniń eki dúrkin Olımpıada chempıony bolýǵa múmkindigim bolar edi. Almaty oblysynyń Talǵar aýdanynda ornalasqan Búkilálemdik boks akademııasynda «Arýana» kópatqarymdyq saýyqtyrý ortalyǵynyń ashylý rásimi barysynda «QazAqparat» tilshisine bergen suhbatynda Sıdneı Olımpıadasynyń chempıony Ermahan Ibraımov osylaı dedi.
«Bizdiń kezimizde boksshylardyń sporttaǵy joly qysqa boldy ǵoı. Fızıkalyq múmkindigimen, jigerimen, bapkerlerdiń kúshimen chempıon bolyp júrdi. Ol kezde 30 jasqa deıin múmkindigińdi kórsetseń kórsettiń, kórsetpeseń, «saý bol» deıtin. Al qazir, ǵylymǵa negizdelgen, ınnovatsııalyq tehnologııalar men beıstandarttyq ádistemelermen qamtylǵan sporttyq medıtsınanyń arqasynda sportshynyń sporttaǵy ómirin uzartýǵa múmkindik ashyldy. Endi, boksshylardyń sporttaǵy jasy 35, bálkim 36-37 jasqa deıin uzarsa degen oıymyz bar. Men mysaly, 24 jasymda Atlanta Olımpıadasynyń qola júldegeri atandym. 2000 jyly - 28 jasymda Sıdneı Olımpıadasynda jeńis tuǵyryna kóterildim. Al eger, meniń kezimde Qazaqstanda ǵylymǵa negizdelgen, zamanaýı, sporttyq medıtsınalyq ortalyq bolǵanda, eki dúrkin Olımpıada chempıony bolýǵa tolyq múmkindigim bolar edi. Áıtpese, 32 jas - er azamattyń naǵyz pisip jetilgen kezi ǵoı. Birjan Jaqypov qazir 32 jasta. Onyń áli de joǵary jetistikke qol jetkizer múmkindigi zor», - dedi E. Ibraımov.
Aıta ketelik, aldaǵy naýryz aıynan bastap, bokstan jastar jáne jasóspirimder ulttyq qurama komandalary atalmysh ortalyq mamandarynyń aqyl-keńesin alatyn bolady.
