«Ǵylymı qazyna» baǵdarlamasy boıynsha jaryqqa shyqqan bes kitaptyń tanystyrylymy ótedi

ASTANA. QazAqparat - 12 jeltoqsan kúni Astana qalasyndaǵy Ulttyq akademııalyq kitaphanada «Ǵylymı qazyna» baǵdarlamasy boıynsha jaryqqa shyqqan bes kitaptyń tanystyrylymy ótedi.

Osy kúni QR Bilim jáne ǵylym mınıstrliginiń bastamasy boıynsha júzege asyp otyrǵan «Ǵylymı qazyna» baǵdarlamasy aıasynda 34 tomdyq «Klassıkalyq zertteýler» serııasynyń jáne «Uly dala tulǵalary» serııasy boıynsha «Abaı», «Jambyl», «Qurmanǵazy», «Ábilhan Qasteev», «Kúlásh» kitaptary oqyrmandarǵa tanystyrylatyn bolady.

Atalǵan kitaptardy Almaty qalasyndaǵy «Ádebıet álemi» baspasy jaryqqa shyǵarǵan.

Jańa jınaqtardy tanystyrý rásimine Parlament Májilisi men Senatynyń depýtattary, QR Prezıdenti Ákimshiligi men Úkimettiń laýazymdy tulǵalary, mınıstrlikter men L.Gýmılev atyndaǵy Eýrazııa ulttyq ýnıversıtetiniń ókilderi shaqyryldy.

Bul sharany Muhtar Áýezov atyndaǵy Ádebıet jáne óner ınstıtýty uıymdastyryp otyr.