Ǵylymı ınfraqurylymdy grant arqyly qarjylandyrýdyń jańa tásilin engizý qajet - Toqaev

ASTANA. QazAqparat - Óndiriste ǵylymı-zertteý jumystaryn kóbirek júrgizý kerek. Ol úshin bıznes ókilderi ǵalymdarmen tyǵyz baılanysta bolýǵa tıis,-dedi búgin Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń birinshi otyrysynda, dep habarlaıdy QazAqparat.

Memleket basshysy Ulttyq keńestiń otyrysnda sóılegen sózinde elimizde «aqyldy qalalardy» jáne aglomeratsııalardy damytý isi óte mańyzdy ekenin atap ótti. Sondaı-aq Kaspıı teńizin jan-jaqty zertteý jáne elimizdiń bıologııalyq qaýipsizdigin saqtaý kerek.

Jańa sorttar arqyly astyqtyń shyǵymyn arttyrý, mal tuqymyn asyldandyrý, shóldi aımaqtarda jemis-jıdekti únemdep sýarý sııaqty máselelerge ǵylymı turǵydan qaraý qajet. Osyndaı ózekti baǵyttarǵa aýqymdy granttar bólý kerek. Shyn máninde, granttarmen qamtamasyz etilgen ǵylymı jobalar ózekti, suranysqa ıe bolýy qajet.

«Sondaı-aq ujymdyq zerthanalardyń áleýeti zor. Onda ártúrli ǵalymdar men ǵylymı ujymdar birlesip jumys isteı alady. Men ǵylymı ınfraqurylymdy grant arqyly qarjylandyrýdyń jańa tásilin engizý qajet dep sanaımyn. Sol arqyly alynǵan qural-jabdyqty paıdalaný quqyǵy basqa da ǵylymı mekemelerge berilýge tıis»,-dedi Qasym-Jomart Toqaev.

Sondaı-aq prezıdent Memlekettik satyp alýǵa qatysty normalar naqty jobalardy júzege asyrýǵa kedergi keltirip otyrǵandyǵyna toqtaldy.

«Munda da qaǵazbastylyq, bıýrokratııa bar. Bul jaǵdaı ǵylymı zertteýler men tájirıbelik-konstrýktorlyq jumystardyń merzimine jáne sapasyna kesirin tıgizedi. Memlekettik ǵylymı mekemelerge jáne joǵary oqý oryndaryna osy jumysty memlekettik satyp alý talaptarynan tys júrgizýge múmkindik berilýi qajet»,-dep qosty Prezıdent.