Ǵylymı ataǵy bar muǵalimderge ústemaqy berilýi tıis - jumys tobynan usynys
ASTANA. QazAqparat - «Pedagogtar mártebesi týraly» zań jobasynyń tujyrymdamasyn tanystyrǵan jumys toby ǵylymı ataǵy bar muǵalimderge ústemaqy berý bastamasyn kóterdi, dep habarlaıdy QazAqparat tilshisi.
«Biliktilikti arttyrý kýrstaryn bes jylda bir ret emes, úsh jylda nemese jyl saıyn, biraq belgili bir mólsherde ótkizý kerektigin kórsetetin júıeni engizýdi usynamyz. Sebebi, jańartylǵan mazmun enip jatqan kezde muǵalimder úshin óziniń biliktiligin bes jylda arttyrý azdyq etedi. Tipti úsh jyldyń ózi az. Sondyqtan, múmkindiginshe ony udaıy jasaý kerek. Bul jóninde jumys toby áli jumys júrgizip jatyr», - dedi «Pedagogtar mártebesi týraly» zań jobasyn daıarlaýshy jumys tobynyń múshesi, Astana qalasynyń gýmanıtarlyq kolledjiniń dırektory Eldos Nurlanov BǴM-da ótken jıynda.
Onyń aıtýynsha, mundaǵy jumys tobynyń oıy - biliktilikti arttyrý kýrstaryn tikeleı kezdesý arqyly emes, onlaın júrgizý múmkindigin de engizý kerek.
«Bizdiń oıymyzsha, buny Bilim jáne ǵylym mınıstrligi tıisti bilim berý kýrs baǵdarlamalarynyń katalogyn bekitý arqyly júzege asyra alady. Sonymen qatar, ǵylymı ataqtar, ıaǵnı professor, dotsent jáne magıstr dárejesi úshin ústemeaqyny pedagogtardyń barlyǵyna engizý usynylyp otyr. Bizdiń oıymyzsha, ǵylymı ataǵy jáne magıstrlik dárejesi bar muǵalimderdiń deni birtindep artýy tıis», - deıdi ol.
Eldos Nurlanov atap ótkendeı, sonymen birge, oqý júktemesi de - úlken másele.
«Ózderińiz biletindeı, biz qatysyp júrgen zertteý jumystary Qazaqstandaǵy oqý júktemesiniń edáýir kóptigin kórsetedi. Soǵan baılanysty oqý júktemesine qatysty normatıvti oqý júktemesin Bilim jáne ǵylym mınınstrligine berýdi kiriktirip otyrmyz. Onyń arqasynda BǴM oqý júktemesine qatysty sheshimderin tez ári tıimdi ózgerte alady», - deıdi ol.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda 2019 jyly Qazaqstanda «Pedagogtardyń mártebesi» týraly Zań qabyldaý kerektigin aıtqan edi.
