Ǵylymǵa negizdelgen ekonomıkaǵa kóshý Qazaqstannyń álemdik naryqtaǵy básekege qabilettiligin qamtamasyz etedi
ASTANA. QazAqparat - Búgin Astanada «Qazaqstan - 2050» Strategııasyn júzege asyrý aıasynda «Ǵylymı zertteýlerdiń tıimdiligin quqyqtyq qamtamasyz etýdi jetildirý sharalary jáne olardyń nátıjelerin elimizdiń áleýmettik-ekonomıkalyq jańǵyrtý úderisterine engizý» taqyrybynda dóńgelek ústel ótti. Sharany Senattyń Áleýmettik-mádenı damý jáne ǵylym komıteti men Qazaqstan ulttyq jaratylystaný ǵylymdary akademııasy birlese ótkizdi.
Baǵdarlama aıasynda qatysýshylar L.Gýmılev atyndaǵy Eýrazııa ulttyq ýnıversıteti ǵylymı-zertteý ortalyǵynda bolyp, DTs-60 jedeldetkish kesheniniń (tsıklotron), ǵylymı-zertteý zerthanasynyń jumysymen jáne joǵary oqý orny ǵalymdary men stýdentteriniń ınnovatsııalyq jańalyqtarymen tanysty. Otyrys aldynda ǵylymı-tehnıkalyq kórme ashylyp, onda otandyq ǵylymnyń jetistikteri, ǵalymdardyń jańa tehnologııalyq jobalary, sondaı-aq óndiristik ortaǵa ınnovatsııa engizýdiń is júzindegi nátıjeleri kórsetildi.
Al jıynnyń ashylýynda Qazaqstan ulttyq jaratylystaný ǵylymdary akademııasynyń prezıdenti Nurtaı Ábiqaev qatysýshylarǵa arnap sóz sóılep, Memleket basshysynyń Joldaýynda alǵa qoıylǵan mindetter aıasynda ult ǵylymyn damytýdyń mańyzdylyǵyn aıtyp ótti.
Budan bólek, Áleýmettik-mádenı damý jáne ǵylym komıtetiniń tóraǵasy Aqan Bıjanov elimizdiń ǵylymı áleýetin nyǵaıtý, ǵylymǵa negizdelgen ekonomıkaǵa kóshý ornyqty ekonomıkalyq damýǵa jáne Qazaqstannyń álemdik naryqtaǵy básekege qabilettiligin qamtamasyz etýge yqpal etetinin atap ótti.
«Osyǵan baılanysty Joldaýda ǵylymdy damytýǵa, onyń ishinde salany qarjylandyrýdy ІJÓ-niń qazirgi 0,28 paıyzynan 3 paıyzǵa deıin kóterý arqyly erekshe kóńil bólinip otyr. Jalpy, ǵylym men ınnovatsııalyq qyzmet salasyndaǵy zańnamany odan ári jetildirý qajettigi turǵysynda quqyqtyq jańalyqtar ǵylymı zertteýlerdiń tıimdiligi men sapasyn kúsheıtýge, ásirese, basymdyqqa ıe «jasyl ekonomıkany» damytýǵa baǵyttalýy tıis», - dedi komıtet tóraǵasy.
