Ǵylymǵa bólingen 58,7 mln teńgeniń qarjylyq buzylýshylyǵy anyqtaldy
Otyrysta atalǵan másele boıynsha negizgi baıandama jasaǵan aýdıtorlyq top jetekshisi Serik Nógerbekovtiń aıtýynsha, memlekettik aýdıt nátıjesi ǵylymdy odan ary damytýǵa jáne ekonomıkanyń ǵylymı qamtymdylyǵyn arttyrýǵa kedergi keltiretin birqatar júıeli problemanyń bar ekendigin kórsetken.
«Qarjylandyrý kólemi, ǵylymı zertteýlerdi oryndaıtyn kásipkerlik sektor uıymdarynyń, ǵylymı jobalarǵa tartylǵan qyzmetkerler sany syndy ǵylymdy damytý kórsetkishteriniń tómendeýi baıqalady», - dedi aýdıtorlyq top jetekshisi.
Osy rette ol granttyq qarjyny alýshylar ózderiniń mindettemelerin oryndamaǵan jaǵdaıda aqsha qarajattaryn qaıtarý tetikterin ázirleý qajettigine nazar aýdardy. Onyń dereginshe, mundaı tetiktiń bolmaýy saldarynan grant boıynsha kelisimdegi mindettemesin oryndamaǵan «Sterın» ınnovatsııalyq kompanııasy» JShS-inen 150 mln teńge óndirip alynbaı otyr.
«Granttyq jobalardy júzege asyrý kezeńinde qarajat únemdelgen jaǵdaıda ony qaıta bólý jáne memlekettik bıýdjetke qaıtarý júrgizilmeıdi. Sonyń saldarynan «Ǵylym qory» AQ-nyń baqylaý esepshotyndaǵy 32,3 mln teńge qarajat oqshaýlandyrylǵan. Memlekettik aýdıt qorytyndysynda jalpy somasy 58,7 mln teńgeniń qarjylyq buzýshylyqtary anyqtalyp, onyń 52 paıyzy aýdıt barysynda qaıtaryldy. Sondaı-aq ókiletti organǵa ákimshilik óndiris qozǵaý úshin bir materıal jiberildi», - dedi Serik Nógerbekov.
Al QR Bilim jáne ǵylym vıtse-mınıstri Ashat Aımaǵambetov vedomstvo tarapynan barlyq eskertýler qaperge alynyp, anyqtalǵan buzýshylyqtardy joıýǵa baǵyttalǵan jol kartasynyń ázirlengenin aıtty.
«Buzýshylyq bolǵan 58,7 mln teńgeniń qazirdiń ózinde 48 mln teńgesi respýblıkalyq bıýdjetke qaıtaryldy. Bul oraıda 58,7 mln teńgeniń 46 mln teńgesi bizdiń bir ýnıversıtetke tıesili ekendigin atap ótken jón», - dedi ol.