Ǵylymǵa belgisiz 11 metrlik janýar pildermen qorektenedi
ASTANA. 24 sáýir. QazAqparat - Aty ańyzǵa aınalǵan Loh-Ness sýlaryndaǵy qubyjyqtan asyp túsetin aıýandy jýyrda ǵana afrıkandyq ańshylar kórip, oǵan Mokele-mbebe degen at qoıǵan eken, dep habarlaıdy Lenta-rý.
Ańshylardyń aıtýynsha, olar qazirgi ǵalymdar dınozavr dep júrgen janýarlarǵa uqsaıtyn kórinedi.
Mokele-mbebelerdiń denesi uzyn, túsi surǵylt-qońyr, moıny jińishke ári uzyn, boıynyń bıiktigi shamamen 11 metr bolady. Olar negizinen Kongo ózeni jaǵalaýyndaǵy úńgirlerde, djýnglıde tirshilik etedi. Sol jerlerden tabylǵan súıek-saıaq pen basqa da qaldyqtarǵa qaraǵanda, bul qubyjyqtar pildermen, qoltyraýyndarmen jáne gıppopotamdarmen qorektenetin kórinedi.
Amerıkanyń zertteýshileri jergilikti turǵyndardyń alyp-qashpa áńgimelerin óz kózderimen tekserip shyǵý úshin afrıka djýnglılerine sapar shekpek. Dınozavrlardyń «tiri qalǵan týystaryn» zertteıtin ekspedıtsııa osy jyldyń maýsymyna josparlanyp otyr.
Ekspedıtsııa músheleriniń biri Stıven Makkýlanyń aıtýynsha, bul sapar afrıkanyń ıt tumsyǵy ótpeıtin ormandarynda eshkimge beımálim flora men faýna túrlerin kezdestirýge bastama bolýy ǵajap emes. «Biz sol óńirden taıynshadaı órmekshilerdi kórgen adamdardyń áńgimesin estidik. Úsh aıǵa sozylatyn birinshi saparymyzda Mokele-mbebeni kezdestire almasaq ta, onyń shynymen sol óńirde ómir súretindigin dáleldeıtin mańyzdy aıǵaqtar tabatynymyzǵa senimdimiz», - deıdi ol.
