Ǵylymdy qarjylandyrýǵa psevdoǵalymdar «maıshelpek» retinde qaramaýy kerek - Prezıdent
«Ýnıversıtetterdegi ǵylymdy júıeli túrde damytý úshin ǵylymı mekemelerdiń aýqymdy jelisin qalyptastyrý qajet. Aımaqtarda akademııalyq artyqshylyq ortalyqtaryn, sondaı-aq tehnoparkter, ınjınırıng habtary men zerthanalar ashýdy tapsyramyn. Bul rette aımaqtyń ereksheligimen qatar, ǵylymı-tehnologııalyq jáne ekonomıkalyq damý basymdyqtaryn eskerý mańyzdy.
Ǵylymdy memleket tarapynan qarjylandyrýǵa ǵalymdar, naqtyraq aıtqanda psevdoǵalymdar «maıshelpek» retinde qaramaýy kerek ekenin basa aıtqym keledi. Qarjy granttarynyń kóbinese ǵylymı mańyzy, ózektiligi joq jobalarǵa beriletini eshkimge jasyryn emes. «Parasat» ǵylymı holdınginde bolǵan ókinishti jaǵdaı – osynyń anyq mysaly. Bólingen qarajattyń bári qumǵa sińgen sýdaı boldy. Al onyń burynǵy basshysy, hımııa ǵylymdarynyń doktory Amerıka azamattyǵyn alyp, otbasymen birge elden ketip qaldy.
Elimizdegi zertteý ýnıversıtetteriniń sanyn birtindep kóbeıtý qajet. Sheteldiń jetekshi joǵary oqý oryndarynyń fılıaldaryn ashý tájirıbesin jalǵastyrý kerek», - dedi QR Prezıdenti.
Odan bólek, memleket basshysy elde doktoranttardyń sany az ekenin tilge tıek etti.
«Sondaı-aq ǵylymı-jaratylystaný, ınjenerlik-tehnologııalyq jáne áleýmettik-gýmanıtarlyq baǵyttaǵy myqty ǵylymı ortalyqtar men ınstıtýttardy ashý jónindegi keshendi jospardy iske asyra bastaǵan jón. Budan bólek, qazirgi ǵylymı-zertteý ınstıtýttary qyzmetiniń tıimdiligine saraptama jasaý óte mańyzdy. Sondaı-aq jas ǵalymdarǵa tartymdy bolý úshin ınstıtýttardyń jumys isteý tásilderin jetildirý kerek.
Ǵylymı kadrlardy daıarlaýdyń máni zor. Búginde ýnıversıtetterdegi ǵylymı zertteý jumystarynyń negizgi qozǵaýshy kúshi – doktoranttar. Áıtse de olardyń sany bizdiń joǵary oqý oryndarynda bilim alýshylardyń 1 paıyzyna da jetpeıdi. Ókiletti organdarǵa doktorantýraǵa qabyldanatyndardyń sanyn tıisti deńgeıge jetkizýdi tapsyramyn. 5 myń jetkilikti tsıfr dep oılaımyn. Mınıstrlik bul máseleni qaıta qarap, onyń naqty sany men sanatyn anyqtaýy jáne tısti sheshim qabyldaýy qajet», - dedi Qasym-Jomart Toqaev.
