Ǵylymdy qarjylandyrýǵa qatysty sheshimdi ǵalymdar qabyldaıdy – komıtet

ASTANA. QazAqparat – Endi ýaqytta ǵylym salasyna bólinetin qarjyǵa qatysty sheshimdi otandyq ǵalymdardyń ózderi qabyldaıdy. Bul týraly QR Ǵylym jáne joǵary bilim mınıstrligi ǵylym komıtetiniń tóraǵasy Darhan Ahmed-Zakı málim etti, dep habarlaıdy QazAqparat tilshisi.

«Qazir qarjylandyrý nemese odan bas tartý týraly sheshimdi ǵalymdardyń ózderi qabyldaıdy. Sonymen qatar ǵylymı keńes músheleriniń etıkalyq kodeksi qabyldandy. Ony buzý keńesten shyǵýǵa negiz bolady. Ulttyq keńes sheshimderiniń obektıvtiligi men negizdiligin arttyrýǵa baǵyttalǵan apellıatsııalyq komıssııa quryldy. Sol sııaqty ǵylymı konkýrstyq rásimderdi jeńildetý boıynsha aýqymdy jumys júrgizildi. Olardyń merzimi 2 ese qysqartylyp, ǵalymdarǵa qarjylyq derbestik berildi», - dedi Darhan Ahmed-Zakı Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, mınıstrliktiń endigi mindeti ǵalymdardyń kadrlyq jáne ǵylymı áleýetin nyǵaıtý.

«Otandyq ǵalymdarǵa qoldaý kórsetý jáne ǵylymnyń damýyna jan-jaqty yqpal etýdiń birden-bir joly, granttyq qarjylandyrý konkýrstaryn ótkizý. Sol sııaqty oǵan bólinetin qarjy kólemin ulǵaıtý. Aıtar bolsaq, 2020-2022 jyldarǵa jas ǵalymdardyń bir ǵana konkýrsy boıynsha ǵylymı zertteýlerdi granttyq qarjylandyrýdyń jalpy kólemi 9 mlrd teńgeni quraıdy. Ǵylymı granttardy qarjylandyrý únemi suranysqa ıe. Tek 2021 jyly mınıstrlik jobalardy qarjylandyrý kólemi men iske asyrý merzimi ártúrli granttarǵa 5 konkýrs ótkizdi. Árbir jobany qarjylandyrý kólemi qoıylǵan mindetter men júrgiziletin zertteýlerdiń aýqymyna baılanysty», - deıdi ol.

Buǵan deıin elimizde sońǵy úsh jyl ishinde ǵylym salasyna bólinetin qarjynyń 70 paıyzǵa artqany týraly habarlaǵan edik.