Ǵylymdy ekonomıkanyń kókeıkesti muqtajdyqtaryna qaraı burýymyz kerek - A. Sárinjipov
ASTANA. 9 jeltoqsan. QazAqparat - Ǵylym ekonomıka men ınnovatsııanyń tolyq úndestiginde bolýy kerek. Búgin Májiliste ótken Úkimet saǵatynda Bilim jáne ǵylym mınıstri Aslan Sárinjipov osylaı málim etti.
«Ǵylym salasynda jobalardy bólý jáne qarajatty tıimdi paıdalaný kezinde problemalar barshylyq. Aıtalyq, ekonomıka men ındýstrııalandyrý qajettilikteri de tolyq eskerilip otyrǵan joq. Jalpy, ǵylym ekonomıka men ınnovatsııanyń tolyq úndestiginde bolýy kerek. Sondyqtan da, ulttyq ǵylymı keńesterge ındýstrııa ókilderin tartý josparlanyp otyr», - deıdi Aslan Sárinjipov. Bul rette mınıstr ǵylymdaǵy kadrlardyń básekege qabilettiligin arttyrýdyń qajettigine de toqtalyp ótti. Onyń aıtýynsha, aldaǵy ýaqytta ǵylym salasyn granttyq qarjylandyrý esebinen PhD-doktorlarynyń sanyn 1000 adamǵa jetkizý kózdeledi.
Jalpy mınıstrliktiń usynǵan málimetine qaraǵanda, aldaǵy ýaqytta ǵylymı-zertteýlerdi qarjylandyrý qurylymyn ońtaılandyrý sharalary qabyldanatyn bolady. Atap aıtqanda, ǵylymı zertteýlerge jeke kapıtal úlesin 25 paıyzǵa arttyrý josparlanyp otyr. Al ǵylymı zertteýler kólemindegi ǵylymı-tehnıkalyq ázirlenimderdiń sany 40 paıyzdy quraıtyn bolady. Eske salsaq, bul kórsetkish 2011 jyly 26 paıyzdy quraǵan bolatyn.
